Over streektaolmeziek is neit veul schriftelijk vastlegd. Vrouger, zeg maor in de 16e, 17e en 18e eeuw, was waark van Gerbrand Adriaensz Bredero, Constantijn Huygens en Joost van den Vondel wel bekend. Van dit dreital weiten we, dat ze ook wat versies schreven hebben in heur streektaol. Dat was in het geval van Bredero en Vondel in het Waterlands, in een Hollands dialect dus.

De verspreiding van Nederlandse versies wui meugelijk deur de drukkunst. Het waren meisttieds onbekende dichters en muzikanten dei de versies schreven. Rondtrekkende muzikanten pikten de versies op van de straode en gaven dei deur an drukkers en uutgevers. Bie heur optredens verkochten ze dei boukies. Langs de deure kwamen venters mit versies op lösse vellen. Straotmuzikanten verkochten boukies mit versies, dei ook op de maarkt, op feesten en op de kermis verkocht wuiden.

In de wintermaonden van 1940 wui het Bonte Bitse Cabaret opricht deur Peter van der Velde. Hij wol het volk wat vertier brengen in dei male tied van de winter van vartig. Zie hadden veul succes en mèensen kwamen van heinde en verre naor Roden tou om te kieken naor het BBC. Mooie verhaolen genog. Zoas dei keer dat der uut Marum een bus vol volk naor Roden kwam veur het BBC. Omdat der tou gein benzine te kriegen was, hadden de Marumers ein peerd veur de bus spand en zo kwamen ze toch beschut tegen de kolde in Roden. Ein tocht van 12 km… en ’s naachts weerom vanzölf!

Uut het butenlaand kinnen wie allerhaande soorten meziek waorin de woorden in ein streektaol zongen worden. Van de Samen boven in Finland tot an de Siciliaonen tou wordt zongen in de eigen taol. Wie zein daorin dingen die typisch heuren bie dei cultuur.

In het jaor 2004 is streektaolmeziek neit meer vort te denken. Op de bekende streektaolwebstee van Joop van den Bremen (op de webstee van Drentse Taol steit wel ein verwiezing) staon op 8 september 2004 maor leifst 2502 streektaolartiesten nuimd, waorvan 95 uut Drenthe. Zie binnen neit allemaol meer drok dounde, maor de Drèentstaolige meziek leeft.