De activiteiten van het Huus van de Taol en Het Drentse Boek wordt mit meugelk maakt deur financiële ondersteuning van de provincie Drenthe.
Mededeling
Wat veur Drèents kuj hier lezen?
De teksten op dizze webstee binnen schreven in een stuk of
wat varianten van het Drèents. Het huus van de Taol vindt aal soorten Drèents
hartstikke mooi. Of een tekst noe schreven is in 't Noord-Drèents van Rowol, 't
Veenkeloniaols van Valthermond, 't Zuudoostzaand-Drèents van Oring, 't
Zuudwest-Drèents van Zuudwolde, of 't West-Drèents van Diever, dat maokt niks
oet.
Thoesblad
Drentse Boekenweek 2009
vrijdag 17 juli 2009
Van 7 tot 17 november 2009 is het weer Drentse Boekenweek. Mit een boekenweekkedo daj veur niks mit kriegt aj veur meer dan €12,50 an ( Drentse) boeken koopt . Het geschenk is dit keer eschreven deur Jan Veenstra en Ton Peters.
Dörpsstraot, oes dörp. Het boekenweekkedo van 2009.
In dreiendartig lösse verhalen en even zoveul gedichten beschrieft
JanVeenstra en Ton Peters eigenaordige stukkies bestaon in Drenthe. Jan
enTon kuiert deur Dörpsstraot, Oes Dörp, ze kiekt rond, legt het oor te
luuster, noteert hier een indruk, daor een gebeurtenis en wat wiederop
een gedachte.
Alles bij menaar is het een soort dörpskroniek: mangs luchtig,
mangs eernsachtig, mangs gek of dwars. Precies as het leven zölf in
zoe’n Drents dörp. Mit een café, een snackbar, ien of twei karken, een
openbare en christelijke schoele, een dörpshuus, de C1000, een bluiend
verieningsleven, een jaorlijks feest en een mix van autochtonen en
import.
Mar hoe apart is dat dörpsleven feilijk?
De bosschop van dit boekie mag autochtonen en import in gelieke maote
tot treust wezen, want welken as de bewoners van Dörpsstraot, Oes Dörp
kuj in alle soorten en maoten ook tegenkomen an de Lange Poten, in de
Barteljorisstraot of in de gevangenis.
Mar dizzenden woont nou ienmaol in Dörpstraot, Oes Dörp.
En lichtkaans dat zoks heur taal en tiekens ook wat apart inkleurt.Wat
plattelaands! Zoas in elk geval ook zichtbaor is bij ien van de beide
schrievers.
Ton, de import- Drent die zien gedichten rechtstreeks in het Drents schrif. Dat is nog knap apart!
Groot bier was het niet,mar ze had er aordigheid
an. Nao de overgang was ze eerst gaon
aquarelleren,mar dat bleek te tam en daorum
schreef ze nou erotische verhalen.
Stiekem vanzölf. Herman had er niks mit
neudig.
As hij hen vissen was, kreup ze mit
warme sukkelao achter de pc.Veur de wissigheid
zette ze de verhalen op een stick, al wus
Herman niks van computers. En as ze der iene
verzunden had naor www.shespot.nl, wiste ze
de mail mitien weer uut het postvak.
Verschillende verhalen waren al eplaatst. En
ze kreeg beste cijfers van de lezers.
Ze speulden allemaol op kantoor.Zoe’n kantoor
waor zij tot heur dreienvieftigste ewarkt
had. Heur heldin was Jane. Lang donker haor,
een pront lief mit fiere borsten en een stemme
waormit ze de mannen zo de broek uut preut.
Jane was ofdielingssecretaresse, net as zijzölf
ewest was.Daorum had Jane ook heur binnenleven.
En het uterlijk van Johanna, heur vriendin
van vrogger, die alle kerels kriegen kun die ze
hebben wol.
Destieds, as ze samen uut waren, had zij an
het taofeltie in daanszaal Klok wel ies zitten
fantaseren hoe mooi het wezen zul um een aovend
van lief te ruilen. Ien hiele aovend. Of in
elk geval tot twaalf ure. Net as Assepoester.
Wat zul ze die jongen de kop gek maken.
Zoas Boudewijn, die bier leup te motten op
heur tassie, dat toen mit zien buusdoek dreug
wreef en het mit een hiele lieve glumlach
weerum gaf. Mar mitien stun Johanna al naost
hum.Toen was ’t bekeken.
De week daorop kreeg ze kennis an Herman,
Boudewijn zien kammeraod. Een dikke dozerd,
mar doodgoed. Binnenkört waren ze dartig
jaor etrouwd.
Johanna zat intussen al weer viefentwintig
jaor in Amerika. Eerst mit Boudewijn,
toen mit Bruce en nou mit Steve.
Ze begunde te typen: In heur strakke mantelpakkie
wiegde Jane het kantoor van de neie manager
binnen en zette heur op het tippie van zien
bureau.Traog scheuf ze de bienen ietsie uut menaar.
Hij keek op en gnees.Al vlot zag ze wat moois
gruien in zien broek. Jane fluusterde hies:‘Wil ie wel
in mien poesiealbum schrieven?’
Ze keek op van de toetsen en gniffelde. De
neie manager die ze net verzunnen had, leek
precies op meister Bos van vrogger. Ze kende
zien varsie nog uut de kop.
–
Jan Veenstra
Op hozevörrels
Heur woorden komt op hozevörrels langs
asof ze angst hebt dat gien mens ze snapt
asof ze liever stilte binnen stapt
en naor een vaste stee zuukt, tweiderangs
Heur zinnen slingert langzaom naor een punt
as water dat gien weet hef van de zee
as iene die genog hef an ’t idee:
het leven har ook minder wezen kund
En gliedt ze straks deemoedig oet de tied
dan schaomt ze zuk veurof al veur ‘t verdriet
–
Ton Peters
Boekhandels die as mitdoet:
Assen Boekhandel Iwema,
Boekhandel Hummelen,
Boekhandel van der Kuijl,
Boekhandel Goedhart
Beilen
Het Logboek,
Bruna Boekhandel
Borger
BrunaWichertjes
Coevorden
Boekhandel Kardol,
The Readshop
De Wijk
Het Wolvennest Dwingeloo
’t Brinkhuus Eelde
Bruna Boekhandel
Emmen
Boekhandel PlantageVermeer,
Readshop Boelens
Exloo
GeertsWarenhuis
Gieten
Bruna Boekhandel
Hoogeveen
!Pet Boekverkopers Klazienaveen
Bruna Boekhandel
Meppel
Bruna Boekhandel,
Boekhandel Barth
Nieuw Roden
De Pinguin Norg
Mari kari
Roden
Boekhandel Daan Nijman Westerbork
Bruna Boekhandel
Zuidlaren
Boekhandel Wolters
Zuidwolde
Boekhandel Spijkerman
Activiteiten in de Boekenweek:
KOM ALLEMAOL NAOR DE OPENING VAN DE DRENTSE
BOEKENWEEK OP
6 NOVEMBER 2009 OP HET
KOOPMANSPLEIN IN ASSEN
6 november:
ASSEN: Swingende opening van de Drentse Boekenweek 2009: Drentse rap uut het Boekenweekkedo op het Koopmansplein m.m.v. Desean, Desmo en DAB en de breakdancers Unknown People. Daornao de officiële opening deur dhr. Jacques Tichelaar, Commissaris van de Koningin in de provincie Drenthe.Tied 20.00 uur - 21.00 uur
ASSEN: Schrieversfeest
7 november:
Drentse Boekenbus op Schrieverstoer mit Jan Veenstra, Ton Peters, Geert Jan Brader en rappers. Locaties: Beilen: Het Logboek, Borger: Bruna, Gieten: Bruna, Zuidlaren: Wolters, Roden: Daan Nijman.
10.00 uur start Het Logboek Beilen
10.30 uur vertrek naor Borger
11.30 uur start lezen Bruna Borger
12.00 uur vertrek naor Gieten
13.30 uur start lezen Bruna Gieten
14.00 uur vertrek naor Zuudlaoren
14.45 uur start lezen Wolters Zuudlaoren
15.15 uur vertrek naor Roden
16.00 uur start lezen Daan Nijman Roden
8 november:
HOOGEVEEN: Delia Bremer, Jan Veenstra en Ton Peters in de bibliotheek.
Tied: 14.00 uur -15.30 uur
9 november:
WESTERBORK: Ton Peters en Jan Veenstra in de bibliotheek. Tied: 16.15 -17.00 uur
12 november:
PEIZE: Ton Peters en Jan Veenstra mit aovendvullend programma in de bibliotheek. Tied 20.00 - 22.00 uur. Organisatie: DAP i.s.m. de bibliotheek.
13 november:
BEILEN: Jan Germs en Egbert Hovenkamp II in de bibliotheek. Tied: 15.00-17.00 uur
NORG: Willem Pol in de bibliotheek. Tied 15.00 -17.00 uur
COEVORDEN: Jan Veenstra en Ton Peters bij boekhandel Kardol. Tied 15.00-15.30 uur
EMMEN: Jan Veenstra en Ton Peters bij Plantageboekhandel Vermeer. Tied: 16.15 - 16.45 uur
MEPPEL: Jan Veenstra en Ton Peters in de bibliotheek van 19.00-19.30 uur en van 20.00 - 20.30 uur bij boekhandel Barth.
16 november
OOSTERHESSELEN: Uitleenaovend mit Lukas Koops.
De avond is tegelijkertijd een afronding van de cursus Geschiedenis van Oosterhesselen en Gees. Tied: 18.00 - 20.00 uur. Iedereen is welkom en er zijn geen kosten aan verbonden.
17 november:
SLEEN: Gezellige slotaovend mit Drentse schrieverij en muziek en de prissentatie van cd Nog zoveul doen van Geert Jan Brader op de Deel bij Roelof Klinkhamer in Sleen. Elkenien is welkom vanof 20.00 uur.
Spetterende opening op Koopmansplein vrijdag 6 november 2009
Vanof 20.00 uur is er een spetterend programma met poëzie, rap en muziek.
Rond 20.30 uur zal commissaris van de koningin Jacques Tichelaar de boekenweek openen. Rappers gaot an het wark met een tekst van Ton Peters en de beat van Zukarn uut Hoogeveen.
De rappers Desean, D.A.B en Desmo gaot der op die aovend de show met stelen: De Boekenweekrap.
De huid is in het Drents de hoed en brood betekent stoet
en als een Drent ‘kon minder’ zegt dan vindt hij het heel goed
als Hendrik hen de bolle wil, dan wil hij naar zijn stier
maar vraagt hij om een mieghummel dan is dat dus een mier
Ton Peters is een echte import-Drent. Hij is geboren in de Achterhoek maor woont sinds jaor en dag in Elp. Ton publiceert al jaoren gedichten, veural de lichte soort. Dit jaor hef e veur het eerst in het Drèents schreven. In het boekenweekkedo staot 33 Drèentse gedichies van zien haand. Speciaal veur de opening van de Drentse Boekenweek maakte hij ok zien eerste Drèentse liedtekst. De coupletten bint gedeeltelijk in het Nederlaands. Ze gaot over de onverwachte woorden en wendings van de Drèentse taal die allennig opvalt an mèensen die hier later bint kommen wonen.
Het meulenpeerd draait smeugel met de bekkerd rondebond
en ergens in de verte loopt een oude waggelkont
de Drentse vrouw vertaalt mijn lijf voor altijd in mijn lief
en wie haar mooie taal niet snapt die is zijn eigen dief
De beat is van Zukarn, geboren en getogen in Hoogeveen. Net as de mieste Drenten is hij tweetalig opvoed. Thuus weur der naost het Nederlaands veul Bahasa Indonesia praot want Zukarn zien moe komp oet Indonesië.
Met zien rapgroep Crime 2 Rhyme begunde Zukarn drei jaor leden in Hoogeveen met het geven van workshops. Jongern oet verschillende wieken van Hoogeveen, die underling nogal ies mot hadden, deden daor an met. Ze lèerden muziek maken, teksten schrieven en aandere creatieve dingen, allemaol under het motto “Beter rappen dan meppen”.
Van het project maakte RTV-Drente in 2007 de reality-serie “Mijn wereld en de jouwe”.
De gastheer van de aovend is Desean, aj ’t zegt klinkt het as Deesjaon. Hij kwam op de wèreld in Tahiti en gruide op bij de familie Veuger in Nieuweroord bij Hoogeveen. Desean rapte in het begun van zien loopbaan in het Engels. Later gung e over op het Nederlaands. Hij is een succesvol rapper: Tweedes bij de Drentse poppries 2007 in de categorie r&b en hiphop. Veurig jaor bracht e zien eerst minialbum oet. Die kreeg de titel “Boeren Kroeskop” met. Hij zingt daorop under andere: “Wat de boer niet kent moet de boer maar es een keertje leren eten”. Desean is ok bekend deur zien optredens as host bij grotere evenementen. Met zien energieke optreden en humor wet hij het publiek enthousiast maken.
Het is veur Desean de eerste keer dat e een Drèentstalige rap giet presenteren. Hij verzörgt de show samen met de rappers D.A.B en Desmo en de breakdancers Unknown People. D.A.B en Desmo komt oet Emmen. De drei leden van de Unknown People combineert breakdance met aandersoortige daansen as waving, tectonic en strobing.
Het wordt een spetterend spektakel, dizze Drèentse rap op het Koopmansplein, dizze cross-over tussen Drèents en rap, bedacht, schreven, componeerd en oetvoerd deur Drenten met zoeveul verschillende achtergronden.
De Drentse taol, de Drentse taol
is makkelijk te leren man, ie kunt het allemaol
de Drentse taol, de Drentse taol
der is gien donder an, ie kunt het allemaol
De show is tussen acht en negen uur. Zo rond half negen zal Jacques Tichelaar, oenze Commissaris van de Keuningin de Drentse Boekenweek officieel lös doen.
Ok wordt in dizze weke de neie Schriefwedstried van het Huus van de Taol bekendemaakt. Een schriefwedstried in twee categorieën, veur begunnende schrievers en schrievers die al publiceerd hebt. Het thema is “Winter”en de wedstriedveurwaarden kuj hier vienden.
Opening Drentse Boekenweek op 6 november
Vrijdagaovend 6 november was het zowied! Op het Koopmansplein in Assen weur de Drentse Boekenweek 2009 lösdaon mit een spetterend optreden van de rappers D.A.B. en DESMO, host Desean en de breakdancers Unknown People. Het pebliek bestun uut een flinke koppel Drentse schrievers mar ok winkelend publiek bleef staon um te kieken wat er te doen was. De Assenaren kan niet ontgaon wezen dat de Drentse Boekenweek lös is want Warenhuis Vanderveen har het de hiele aovend op zien lichtkraant staaon. Gastheer Lo Dijkstra verwelkomde het publiek en legde even in het kort uut wat de Drentse Boekenweek is. Der much ja ies iene wezen die dat nog niet wet!! Ie weet mar nooit!
Daorna gaf hij de microfoon an host Desean die het refrein van de rap instudeerde mit iene uut het publiek. Dat het toevallig de nestor van de Drentse schrieverij, Marga Kool, was kun hij vanzölfs niet weten!
Vervolgens leuten de breakdancers heur kunsten zien waorbij benaom de breakdancer die op ien haand in de rondte dreien kunt de waardering van het publiek kreeg.
En toen was het de beurt an de rappers. Ze leuten een mooie Drentstalige rap, schreven deur Ton Peters, heuren.
Het refrein:De Drentse taol, de Drentse taol, wij kunt het allemaol weur massaal deur het publiek mitzungen.
Nao het spektakel op het Koopmansplein gungen de Drentse schrievers op weg naor ’t Café waoras het schrieversfeest zul wezen. Roem zestig schrievers kwamen derop of. In het schrieversfeest was de officiële prissentatie van het Boekenweekkedo Dörpsstraot Oes Dörp.
Jan Veenstra vertelde in zien inleidend praotien dat zij het jammer vunden dat de commessaris van de Keuningin der niet bij wezen kun um het 1e exemplaar in ontvangst te nemen. ‘ Mar de commessaris hef vast belangriekere dingen an de kop. Wellicht prat hij op dit moment in Den Haag over het samenvoegen van de provincies Grunning, Friesland en Drenthe. Of wij daor nou wel of niet wies mit wezen laot ik in het midden mar zeker is dan in elks geval dat het Nedersaksisch groter wordt dan het Fries’, aldus Jan Veenstra.
Vervolgens brachten schrievers van het Boekenweekkedo, samen mit Geert Jan Brader, een echte Drentse smartlap, op de wies van ‘ Een man mag niet huilen’ ten geheure.
Um het 1e exemplaar van het Boekenweekkedo toch an te langen weur der een kleine kwiss mit ien vraog holden. Helaas wus gien van de anwezigen het goeie antwoord en daorum kreeg Abel Darwinkel het 1e exemplaar. Um zien mooie trouwe ogen en ok umdat hij Jan en met name Ton hölpen hef bij het schrieven van de gedichten.
Nao nog wat huusholdelijke mitdielings van Baukje Bloemert kun het feest dan echt begunnen.
De muziekgroep The Stokers har der wel zin in en het was dan ok volop feest in ’t Café.
Rond twaalf uur waren de mieste schrievers hen huus vertrökken.
De echte feestbeesten bint deurgaon tot in de late uurties!
Schrieverstoer op 7 november
Zaoterdag 7 november is, in het kader van de Drentse Boekenweek, de Schrieverstoer van start gaon. De mitwarkers verzamelden zich um 9.00 uur in het Huus van de Taol in Beilen. Veur de miesten was dit wel wat vrog umdat ze de aovend erveur het schrieversfeest bijwoond hadden. Nao een paar koppen starke koffie weur de apparatuur en het promotiemateriaal inpakt in de bus van het Gevangenismuseum uut Veenhuzen. Nog een leste foto veur de bus en de Schrieverstoer was lös.
De 1e halte was boekhandel Het Logboek in Beilen.
Taolschulte Aly Mulder en boekhandelaar Hedika stunden al veur de winkel mit koffie de Schrieverstoer op te wachten.
Nao het opbouwen van de apparaat begunde rapper Jeroen, alias D.A.B., mit zien Drentstalige rap.
Het refrein van zien Drentse rap De Drentse taol, de Drentse taol wij kunt het allemaol weur deur het publiek mitzungen.
Uut het toegestroomde kwam zölfs een rapper die spontaan mitrapte.
Het duo Geert Jan Brader en Ton Peters zungen hiernao een Drents protestlied tegen de teloorgang van de Drentse taol.
Ton Peters las vervolgens een gedicht uut het Boekenweekkedo Dörpsstraot Oes Dörp. Het boekie is schreven mit een knipoog naor het Monopolyspel. “Gao naor de gevangenis” is ien
van de kanskaorten, en daorumme paste de busse van het Gevangenismuseum
er zo mooi bij.
Het verhaal, Het Zadel, weur deur Jan Veenstra op zien eigen onnaovolgbare menier veurlezen en zowel het gedicht as het verhaal veulen bij het pebliek zeer in de smaak. Tot slot weur de Drentse smartlap ‘ Een Drent mag niet reren’ ten geheure bracht (zie de tekst hieronder).
Mit dank an de gastvrije ontvangst van boekhandel Het Logboek in Beilen weur nao een krap half ure de apparatuur in de Gevangenisbus inpakt en gung de Schrieverstoer op pad naor de Bruna boekhandel in Borger.
In Borger was het krap parkeren in het straotie van Wichertjes Bruna Boekhandel, maar Taalschulte Willy Weerman leidde oons prima naor de plek van bestemming. Ook daor was de verzorging prima. De eigenaar was net weer vader eworden,maar had de boel goed veur mekaar en had veur oons koffie eregeld bij de overbuurlunchroom. In Borger stund een uut Brabants ofkomstig jong gezinnegie het hele programma of te kieken. Fietsen an de haand, kiender achter-en veurop, mit een grote croissant in de haanden en een sticker van Hier kuj Drents praoten op de jasse.
Collega- schriever Gerard Nijenhuus moedigde de mannen nog even an veur de tocht wieder gung naor Gieten.
In Gieten stunden keurnoot Jans Stoffers en eigenaar van de Bruna Boekhandel oons al op te wachten. De busse kun daor prachtig veur de winkel staon. De heer Gabriëls introduceerde de schrievers zölf, maakte foto’s en tussen de bedrieven deur wordden der mooie contacten elegd, misschien veur een aandere activiteit.
Het was niet de eerste keer dat in dizze winkel Drentse schrievers te gast waren. Ook Jan Germs las er al ies veur in de zaak. Dezölfde Germs was zaoterdag publiek , maar niet te beroerd mit te hölpen mit het oprumen van de neie beachbanners.
Zuudlaoren was as volgende an de beurt. Een auto’s daor an de Stationsweg. Gelukkig was er veur Wolters boekhandel een mooi plekkie veur de artiesten , het leek zölfs op een podium. Het duurde even, maar toen kwam er toch een mooi koppeltie meinsen staon lustern onder de overkapping.
De staf van taalschulte Herma Stroetinga had grote belangstelling. Een opvolger veur heur is al evunden. En toen begunde het te regen. Jammer.
Het leste adres in Roden, bij de boekwinkel van Daan Nijman. Daor bint ze heel flexibel, en zo kun rapper Desmo veur de boekenkaste zien Drentse rap begunnen. In de winkel was het al gezellig drok, veul volk ook al dat mit Dörpsstraot Oes Dörp in de haanden leup. Keurnoot Jettie Drewes kun heel wat kennissen begroeten. Jan Veenstra had zien teksten op bekende melodieën emaakt, dus veul meinsen herkenden die wel. En tussen het boekensnuffeln deur kunden ze mooi lustern naor de verhalen en muziek. Wie mitzingen wol kun dat doen, want de tekst stund op grote borden, die de schriever vakkundig uut het zicht hölden. Ton Peters en GeertJan Brader bleken dizze middag uut te gruien tot een succesvol muzikaal duo. Zölfs veur tweede en darde stemmen in de melodie dreiden ze de haand niet umme.
Daan Nijman en zien personeel brachten wat te drinken veur artiesten en winkelend publiek en zo kun de Schrieverstoer op een weerdige en gezellige maniere of esleuten worden.
Mit begeleiding van GeertJan Brader hebt de schrievers zo’n gevarieerd
en muzikaal programmaagie in mekare ezet dat het op elke standplaatse
een klein feestie was.
Een Drent mag niet reren
As de vrouw oe hef verlaoten
Waoraj zoveul van holdt
Dan dweel ie deur de straoten
Hej het gloepens kold
Dan woj soms wel ies even
Oezölf wat laoten gaon
Oen ogen wordt al vochtig
En ie vuult iniens een traon
Refrein
Mar een Drent mag niet reren
Ok al hef hij verdriet
Een Drent mag niet reren
Hoe stoer het ok giet
Hij mut alles vergeten
En hum nooit laoten gaon
Nee, een Drent mag niet reren
Zölfs gien enkele traon
Op oen baos hej oe verkeken
Ie kregen oen congé
En oen geld hej op de reken
Bij de DSB
En de vis zit vol mit graoten
Oen auto lat oe staon
Dan wordt het oe te machtig
En ie vuult iniens een traon.
Refrein
Van het optreden bij Het Logboek in Beilen staot twee filmpies op You Tube.
Ok op vrijdag 13 november trökken de schrievers erop uut. Muzikant Jan de Wilde begeleidde de enthousiaste rappers en Jan Veenstra en Ton Peters lazen weer veur uut het Boekenweekkedo Dörpsstraot, Oes Dörp. De schrieverstoer gung van Kardol in Coevern naor Vermeer in Emmen. Daorna gung het gezelschap naor de bibliotheek in Möppelt en naor Boekhandel Barth.
Dinsdag wordt de Drentse Boekenweek dichtedaone op de Deel in Slien. Daor zal Geert Jan Brader zien neie cd Nog zoveul doen prissenteren.
Slotaovend 17 november.
Ok de Drentse Boekenweek holdt een keer op. Op dinsdag 17 november kun iederiene nog ien keer genieten van optredens van Ton Peters en Jan Veenstra en oenze enthousiaste rapper Desmo. Zij werden deur veurzitter van het Huus van de Taol Anne Doornbos ies even goed in het zunnegie ezet. Zoas dat heurt op een slotaovend van een boekenweek lazen diverse Drentse schrievers veur uut eigen wark. Het volk op de Deel bij Roelof Klinkhamer in Sleen kun volop genieten van Gerard Nijenhuis, Lukas Koops, Gerard Stout, Suze Sanders, Anne Doornbos, Ria Westerhuis, Delia Bremer. Egbert Hovenkamp II en Kasper Peters.
Geert Jan Brader prissenteerde zien neie cd Nog zoveul doen en dreug 'em op an vriendin en kiender. Natuurlijk zung hij samen mit zien muzikale begeleiders van de cd: Gijs Kos, Adolf Robertus en Stef Eijkelenkamp een paar nummers van de Drentstalige cd.
Nao een lange maar zeer genoeglijke aovend gungen de bezukers tevreden op huus an.
Van 7 tot 17 november 2009 is het weer Drentse Boekenweek. Mit een boekenweekkedo daj veur niks mit kriegt aj veur meer dan €12,50 an ( Drentse) boeken koopt . Het geschenk is dit keer eschreven deur Jan Veenstra en Ton Peters.
