Ger schreef nao ofloop een enthousiaste brief an het Huus van de Taol:

Vanmörgen hebt wij op het Esdal College in Börger de cursus Drèents verzörgd. Ik har as keurnoot de cursus organiseerd saomen met old-collega Monique Westers. Hoewel Monique in Siddeburen woont en Gröningse is, was zij enorm enthousiast um met mij een cursus in het Drèents te organiseren. Zij hef op schoel de zaok daonig anfieterd.
Eerst heb ik de powerpoint presentatie laoten zien die ik van je metkregen har.
Doe bint de leerlingen in groepen uut elkaor gaon veur het bijwonen van 4 verschillende workshops. (Wat is het juuste Drèentse woord hierveur?)
1. Vertaolen vanuut en in het Drèents. Zij hebt gebruuk maokt van de webstee van het Huus van de Taol en daor het Drèents woordenboek vunden en gebruukt..
2. Het gebruuk van neidrèentse woorden. De leerlingen vunden het prachtig dat er zoveul moderne Drèentse woorden bint. 1 leerling zee:”Ik ken nog niet veel Drents, want ik ben net van Noordwijk verhuisd naar Drenthe. Maar zo leer ik de woorden wel meteen kennen.” 3. Moderne Drèentse muziek. (Daniel Lohues, Skik, Harm en Roelof, Duo Dampo.) De opmarking van de leerlingen was: “Non kriegt wij zeker van die zute liedties.” Maor doe de genuumde artiesten ten toniele kwamen, waoren de leerlingen harstikke enthousiast. Een titel as “klotenweer” harren zij niet verwacht. Veul indruk maokte “Drents wichie” van Duo Dampo over het Jeudse wichie dat naor Polen gung. Er was vortdaodelijk een verbinding met het Jeudse monument in Börger dat het Esdal College adopteerd hef.
4. Rappen in het Drèents. Dat was nog niet zo makkelijk volgens de leerlingen en de docent die de groep begeleidde. De 4 workshops bint geven deur 3 docenten van de schoel en deur mijzölf.

Het gehiel was zun succes dat het Esdal College besleuten hef um volgend jaor weer een cursus Drèents te geven en de docenten die methölpen hebt, wilt volgend jaor weer metdoen. Ik heb d’r een prima gevuul an overholden en stuur ok nog even een paor foto’s met. Groeten, Gerrit