Van 24 juli tot 27 juli kuj weer miodoen an de Drentse Fietsvierdaagse. Roel Reijntjes schreef jaoren eleden ter ere van het tienjaorig bestaon van de Drentse Fietsvierdaagse een gedicht.
Fietsen in Drenthe
De glooiings van de Hondsrug bint maor slicht
met kleine wegen, dalend naor de Venen,
dán: smalle wieken in het niks verdwenen
naor d’overkaant - daor waor het ‘Duutse’ lig…
‘k fiets naor beneen - ik neurie een gedicht,
’t is of het fietsframe zúcht van zommerweelde -
maor meugliek, dat ik ’t mij allén verbeeldde…
het harte roem van wieder vergezicht…
en an de lochten gaot de wolke-schaopen
deur Scheper Wind votdreven… met zien hond
over de spiegels van de blaanke vennen -
en t’ aovend, in de harbarg, zal ik slaopen
slim diep, tot an de roze mörgenstond
en fietsend: leer ik as een minnaor Drenthe kennen…
Roel Reijntjes ter gelegenheid van 10 jaor Drentse Rijwielvierdaagse.
| < Veurige | Volgende > |
|---|
