Oouze metwaarker Abel Darwinkel had op 21 december een column in ’t Dagblad van het Noorden over de verschillende woorden veur kapper. An ’t èende van zien stukkie verwes e naor de website veur zinnegies oet ’t woordenboek van de Drentse Dialecten met Drèentse woorden die kapper beteeiken. Hieronder kuj beide stukken lezen. Anvullings binnen
Dit e-mailadres is beschermd tegen spambots. U heeft JavaScript nodig om het te kunnen zien.
.
Bij de scheerbaos
Der binnen een koppel mèensken die heur drok maoken over taolveraandering. Over de verengelsing van de taol beveurbeeld. Een jaor of wat leden meuiken een koppel mèensken heur drok doe ze de naom van de badmeester veraandern wolden in ‘aqua leisure host’. En op de Pabo in Emmen hebben ze noe een ‘Head of School’. Ik geef daolijk toou dat ik mij ok aarger an zukke Engelse naomen.
Taolveraanderingen oet ’t verleden, daor heb wij vaok wat minder muite met. Aj noe beveurbeeld ’t haor knippen laoten, dan doej dat bij de kapper. Dat is op dit moment, dèenk ik ’t meeist gangbaore woord veur eein die veur geld joen haor knipt.
- Knippen en scheren, zee de kerel tegen de kapper, mor hie was kaol en har gien baord. (Eext)
Mor ’t is nog heulemaol niet zo laang leden dat die beroepsgroep heul aander naomen had. In ’t Nederlaands en ’t Drèents woordenboouk kom wij ’t woord barbier tegen.
- Oen va is hen de barbier zien haor laoten snien. (Broekhuizen)
Barbier komp van ’t Latiense woord veur baord en dat is ‘barba’. In ’t Drèents woordenboouk kom wij ok ’t woord baordscheerder en scheerbaos tegen. Bij die scheerbaos gung ’t der eerder heul aans an toou as vandaog an de dag. Lees de volgende zinnegies oet het woordenboek mor ies?
- Ik heurde vrögger van mien vader dat de scheerbaos vreug: op de doeme of op de lèpel? (Meppel)
- De scheerbaos zette het mes an op de striekreime. (Barger Compascuum)
- Ze gungen naor de stille knippe, en dan was die knippebaos ook vake scheerbaos. (Hoogeveen)
Veur ’t Nederlaands en ’t Drèents geldt dat de woorden barbier en scheerbaos verolderd binnen. Der binnen nog wel verscheiden kapsalons die De Barbier heeiten, mor der is volgens mij gien kapper die op de vraog wat e veur de kost döt, antwoordt dat e barbier of scheerbaos is. In paartie Afrikaonse en Aziatische landen kuj op straot nog wel barbiers tegenkommen. Smanks binnen ze der dan ok nog schooupoetser bij.
Haor laoten snieden en haorsnieder veur knippen en kapper, dat zeg ok vast gieneein meer, al binnen der in Leiden en Rotterdam nog tweei kapsalons die De Haarsnijder heeitten.
- As die haorsnieder je het haor knipt, is het gien gezicht met al die hakken en takken. (Odoorn)
Ik vin ’t niet aarg dat de meeiste mèensen ’t vandaog an de dag over de kapper hebben in stee van barbier of haorsnieder, mor ik gao niet naor een kapper die ‘hairstyler’ of ‘hairdresser’ op de roeten staon hef.
Veur een complete liest met zinnen oet het Woordenboek van de Drentse Dialecten met Drèentse woorden veur kapper, kuj kieken op www.huusvandetaol.nl
bron: dr. G.H. Kocks - Woordenboek van de Drentse Dialecten
reageren: Dit e-mailadres is beschermd tegen spambots. U heeft JavaScript nodig om het te kunnen zien.
Zinnen met woorden veur kapper
Ik wil even naor de jonkmeulen tou. (Zuidlaren)
De olde baos naamp, as hij naor de scheerbaos gunk, altied een dubbeld maotie braandwien mit. (Hoogeveen)
Het haor gruit zo vlug an dat ik om de veer weken wel naor de scheerbaos mag
Hij is zo drok as een scheerbaos mit iene klaante (Meppel)
Bij de scheerbaos wuur hiel wat verhaspeld (Zuidwolde)
De klaante zèe tègen de scheerbaos, toe as die een vinnegien ofschèur: Ie wolden zeker kaant wark lèvern. (Ruinerwold)
De barbier had het haor zo hakkerig eknipt, het was gien gezichte (Hoogeveen)
De barbier scheert mij ok altied de nek uut.
Ik moe even hen de kapper hen haorsnien (Sleen)
Wat hef die kapper mij slecht knipt (Sleen)
Zij giet geregeld hen kapper um het haor te laoten krullen (Ruinerwold)
De kapper luit 'n koefie staon (Roderwolde)
Jan mot even hen te knippen mörgen, as kapper lös is
Ie mugt wel ies naor de kapper (Noordscheschut)
De kapper hef mij de baord even ofdaon (Sleen)
Hij had naor een slechte kapper ewest, het haor was zo raar of ekibberd (Hoogeveen)
Met dat piekhaor kan de kapper ok niks begunnen (Balloo)
Ik bin hen de kapper west, der is een beste pluk ofkommen (Sleen)
Stonties moe'k nog even hen de kapper (Zweelo)
Het is ongeliek verdield: een grösmeier mag wel op de stoppel pissen, mar een kapper niet. (Kerkenveld)
| < Veurige | Volgende > |
|---|
