Wij zitten alweer in de maond mei. In ’t grootste deeil van Drenthe zeggen ze mei, mor in Roon, Paais en Rowol en in de Veenkolonies zeggen ze van ‘mai’ of ‘maai’. In en om Hoogeveen hebben ze ’t over ‘meie’. ‘t Woord Meitied is meer as allén de meimaond, ‘t wordt gebruukt veur ’t Nederlaandse woord ‘lente’. ’t is de periode april-mei.
Der is veul dicht over de maond mei. Dèenk bijveurbeeld mor ies an het lange gedicht Mei van Herman Gorter met de beroemde begunregels:
Een nieuwe lente en een nieuw geluid:
Ik wil dat dit lied klinkt als het gefluit,
Dat ik vaak hoorde voor een zomernacht,
In een oud stadje, langs de watergracht.
Mor ok in ’t Drèents binnen der prachtige gedichten schreven. Peter van der Velde hef tweei geveuilige gedichten schreven met de titel Maitied en ok Roel Reijntjes hef ’t veurjaor bezongen in zien gedicht Zwalvies in de meitied.
Harm Koops hef een mooi gedicht schreven over de meitied. Heur mor ies:
Meitied
Vandaag bin’k even de es opgaon
Ik kun ’t in hoes niet holden
Er was zo wat, ik weet niet wat,
Daj even naor boeten wolden…
De locht was blauw, de rogge gruun
De proemeboom die bluide,
En in mij was wat kriebeligs,
Dat ok naor boeten gruide…
Ik heb een hiele tied daor lopen
Daor maank dat altied neie.
Doe wa’k weer rustig en tevree
Bedoelt ze dat met Meie?
Harm Koops - Drent in de vrömde
mei
Weer 't veurjaor.
Wit en stil de lucht,
de weg.
Het boomgruin pril.
Een vogelvlucht
wiedweg.
Het licht dat hoog
en tastbaor dringt
naor d'olle grond.
Een blui die wit
verbiesterd blinkt
an tak en stronk.
Weer tikt het haart
zo obsternaot,
verwarmt, verkwikt
maor oet de maot.
Elk diertie het zien maot,
het jaor zien Mei,
de veurjaorsnacht is wild
van lust en dreumerij.
Het gef zon wied en waarm geluk,
as alles blinkt en bluit.
Het haart wordt zo verdretig stil,
wanneer de blui versnijt.
Harm Drent
Oet: Oeze Volk 1958
Zwalvies in de meitied
Kommend oet Tipassa - Algerije
Zwalvie, zwalvie, metselaor
Kleine kraloog bis doe daor
Kommend oet het waarme zuden
Wils doe hier dien eigies bruden?
zwalvie, zwalvie, metselaor
maoks doe weer dien nussien klaor?
Brengs geluk en zunneschien
zwalvie, zwalvie, prugeltien…
zwalvie, zwalvie, metselaor
met leem bouws doe dien börgien klaor
met wat spei en kleine strogies
warme veerties: nustkadogies…
zwalvie, zwalvie, metselaor
jao, nou is de meitied daor
scherend brengs doe oes de zommer
vort zint zörge en de kommer…
Roel Reijntjes
| < Veurige | Volgende > |
|---|
