Bert Hadders

Bert is een veulziedige artiest.

Bert Hadders

Bert Hadders is in 1962 in Tweede Exelermond geboren, maor hie woont al dik virtig jaor in Stad (Grunning). Zien streektaolnummers speuld’e tot veur kört samen met zien begeleidingsband De Nozems. Bert har een stuk of wat noordelijke hits zoas Beloofde Laand, Der Zit Gain Schot In Mie en Poolse Bruid.

In 2009 begunde Bert Hadders met dichter/schriever Herman Sandman en gitarist Wyno Bruinsma het programma Gezing & Geplaas.
Samen met de Nozems hef Bert Hadders ok bijdragen leverd an de daarde cd van de Drentse Muziekmaatschappij (SDMM 3).

In 2011 trök Bert zuch een toertie terug in een leegstaonde schoel in Eerste Exelermond. Daor schreef e tien liedties die allemaol heur basis vunden in zien verleden in de Drentse veenkolonies.

Op een rommelmarkt leup Bert tegen een verzameling opnames an van antropoloog drs. Gradus J. Bosklopper van lokale artiesten oet het Drents-Grunningse laand. Of dizze opnames der echt waren? Zeg het maor ies. In elk geval kwam der in 2014 wal een nuvere cd oet under de titel De Bosklopper tapes.

Van 15 mei tot 7 juni 2015 is in de schuur van het akkerbouwbedrief van de familie Schipper-Elberse in Bunermond Iemandsland opvoerd. Dizze muzikale theaterveurstelling was een combinatie van satire, drama, realisme en bizarre fantasie. Iemandsland was inspireerd op de streektaalliedties van Bert Hadders en de Nozems en weur speuld deur noordelijke acteurs. Daarnao meuk e muziek veur theaterveurstellingen as De Kronieken van Kapitein Kolk, De Grup en Roegzand en schreef e veur het Veenkoloniaal Symfonie Orkest vier nummers veur de veurstelling Streekgenoten.

Bert Hadders prissenteerde in 2015 zien eerste Songbouk.

In ‘t begun van 2019 verscheen de cd Kokeleko van het duo Bert Hadders en Joost Dijkema. De plaat weur geweldig goed ontvangen en een tour langs de Noordelijke theaters volgde.

In 2019 kreeg Bert Hadders de prestigieuze K. ter Laanprijs veur zien verdiensten veur de Grunneger taol.

Discografie:

  • Over de badde (2010)
  • De Coöperoazie (2012)
  • De Bosklopper tapes (2014)
  • Tjeu (2018)
  • Kokeleko (2019)

Kiek ok op: www.berthadders.nl