Vrouw Koetje gef raod Het Juk D.v.h.N. 04-05-2002

Vrouw Koetje gef raod Het Juk D.v.h.N. 04-05-2002

VROUW KOETJE GEF RAOD

Het Juk

Beste leesders en leesderessen. Bin ie al een minuut stil west? Goed zo. Dit wegens de doden. Het is altied prachtig as het in het heule laand een minuut stil is. Het liekt wel de autoloze zundag! Zeer rustig! Allent de klokken beiert d’r over van niet normaol. Wij zet altied het geluud van de tillevisie uut. Vervolgens zwieg ik een minuut. Heer Koetje zegt wel ies: Ach meinsch, was het maor alle daogen dodenherdenking! Dan har ik ies wat rust an de kop! Dit alles veur de poelegrap vanzôlfs. Wij hadden zôlf niet veul Jeuden in het dôrp. En die d’r waoren
vertrokken nogal vlot. Ik kende ien wichie van Silverberg. Maor veraanderden die heur naom in Koperman. Dus toen heetten ze van Koperman. Heer Koetje zien vao wol in die tied ok zien naom veraandern. Maor het mug niet van de Duutsers. Dus toen hef hij het nog wel even zegd van Koperman. Dat die vrogger ok aans heetten. Echter hielp dit net niks. Jammer. Aans har ik nou ok een aandere naom. Aj ien letter van de naom wult veraandern, kost het je tiendoezend gulden. Of meer! Dus veurdat ie van Koetje veraandert in Van Gend en Loos of Van Stoetwegen, bin ie een beste stuver wieder. Met de Jeuden is er wel altied wat loos. Ze kunt d’r zôlf niks an doen. Dus blef het ok zo. Gelukkig kwam snel de Bevrijding. Zodoende leeft wij nou in vrede. Dit alles dankzij de Canadezen. Ze joegen in heur kleine jeepies deur de straot van jewelste. Underwiel sukkelao oetdelende. De Canadezen waoren zôlf ok zeer bliede dat ze oes bevrijd hebt. Dit wegens dat ze alle daogen graotis kunden fietern. (Dit alles is van heuren zeggen, wegens te jeugdige leeftied.) Ja, zegt heer Koetje, as ik alle daogen graotis kun fietern, dan deelde ik ok wel sukkelao uut! Hij kent echter gieniens engels. Een oorlog is prima aj hem wint. Maor aj hem verliest hadden ze d’r beter niet an kunnen begunnen. Dit geldt veural veur de
Duutsers. Nou hebt ze d’r spiet van. Maor as ze de oorlog wônnen hadden, leupen ze ok te sukkelao oetdelen! Of misschien wel metworst! Wel de oorlog wint deelt altied wat oet waor ze genogt van hebt. Zodoende deelden de Engelsen sigretten oet. En de Canadezen sukkelao. As wij nog ies een maol een oorlog wint, mugt wij ok wat oetdelen. Waorschienlijk tulpen. Of iets aans wat wij wel missen kunt. Ok goed spul is van die oranje voetbalspullen. Ze bint d’r in allerhande soorten: feestneuzen, Ieuwekoppen, sjaals, vlaggen, tattoewaazjes, gewone toeters, oranje smienk, van die toeters met een bus haorlak d’r under, t-shirts, tompoezen, zunnebrillen, conifetti. Aj een volk bevrijdt en je deelt zukse spulderij oet, hej drekt groot feest. Dan komt de stemming d’r zeer goed in! Dan hadden die Joegoslaven de dag van heur leven had. Net as in ‘t Tialf-stadion! Met een gezellig dweilorkest en alles. Dan was het wel voetjes van de vloer west veur de Joegoslaven! Volgens heer Koetje hadden ze zôk dood mutten vechten met heur blauwe baretten. Maorja, an een dooie held hej ok weinig tôt niks. Zodoende gung het feest niet deur. Vrogger hebt wij een beste vlot oorlogen wônnen. Zuks as tegen De Engelsen, De Belgen, De Spanjolen! Tachtigjaorige Oorlog hebt wij ok wônnen. Het was drekt dik feest toen as we hem wônnen hadden. Dit wegens dat wij de Spanjolen bevrijd hadden van het juk. Ze waoren zeer dankbaor en dansten deur de smalle straoten. En ze zweiden met heur kastanjetten van vreugde! Want as wij de Spanjolen niet bevrijd hadden, zuchtten ze nou nog under het juk. Juk is gewoon alderverschrikkelijkst. Gelukkig wult de Hollanders geern meinschen bevrijden. Nog weer aandern wult meinschen geern under het juk brengen. Zodoende hebt wij een ewige stried. En d’r is overal waorargens een juk. Dit viert wij vandaog. En dat het nooit weer moge gebeuren!