Vijf jaor wachten op een neie bundel beloond… De neie bundel Vioolties an zee is prachtig. Op vrijdag 28 september wordde in het Huus van de Taol de neie gedichtenbundel van Suze Sanders prissenteerd, vief jaor naodat ze de Streektaalpries van het Dagblad van het Noorden kreeg veur heur veurige bundel, Veenbraand. Har Suze de veurige bundel an heur olders opedragen, het eerste exemplaar van de neie bundel was veur heur kiender. Zeun Reinier nam het eerste exemplaar in ontvangst. Dochter Annelien verblef momenteel in het butenlaand. Bij de prissentatie gaf Ton Peters zien mening over de poëzie van Suze Sanders en zei daorover dat de gedichten van Suze Sanders hum eraakt hebt. Zij wet, volgens Ton Peters een verbaand te leggen tussen alledaagse kleine dingen en universele gevulens, waordeur het veur veul meinsen herkenning kriegen kan.Ok muziekduo Ballads2 die as veul liedties in heur repertoire hebt die vertaald bint deur Suze Sanders, was bij de prissentatie en zij leuten heuren dat Suze Sanders ok een prima vertaalster is. Naost het schrieven is zij ok betrökken bij veul literaire projecten en is ien van de oprichtsters van de Neie Drentse Schrieverskring. Vioolties an zee is verkrijgbaar voor € 9,95 bij de boekhandel of via Drentheboeken.com

Op vrijdagaovend 27 juli kwam tijdens een literaire aovend in mfc De Ni'je Stienze in Nijeholtpade de zeuvende roman van Johan Veenstra uut. De name van het boek is Vroeger is veurgoed veurbi’j. Ie kunt het boek bestellen via de website van Johan Veenstra.  Kiek veur uutgebreide informatie over de prissentatie op de website van de Nieuwe Oostellingwerver.  

In de prachtige tuun van schriever Mischa van Huijstee wordde zundagmiddag de verzamelbundel van de Neie Drentse Schrieverskring prissenteerd. Roem dartig Drentse schrievers hebt mitewarkt an Alles wat hier wortel schiet en in de bundel stiet zowel Drentse as Nederlaandse poëzie en proza. Het eerste exemplaar wordde overhandigd an Gerard Nijenhuis die, samen mit Suze Sanders, de initiatiefnemer is van de Neie Drentse Schrieverskring en ok van dizze bundel. De bundel wordt uutegeven deur RikRak in Zuidwolde en kost €12,50. Het boek is te bestellen via drentheboeken.com

Schriefster Miny Hofsteenge (*Eksel 1946 - †Emmen 2018)  is oet de tied kommen

Miny weur geboren in Eksel, maor woonde al meer as virtig jaor in Emmen. Zij schreef eerst in het Nederlands, maor nao een kennismaking met Roet, stapte zij over op het Drents. Zölf zee ze daor het volgende over: “Ik kan met het Drents beter oet de voeten. As ik Nederlands schrief stiet er nooit wat er stiet. In het Drents zeg ik wat ik zeggen wil.”  In 1984 debuteerde zij in het Drents Letterkundig tiedschrift ROET. Heur gedichten en verhalen bint wieder verschenen in een koppel tiedschriften zoas Oeze Volk, Maondblad Drenthe, Pennestreken en Surplus. Miny Hofsteenge schreef veur groten en kleinen. In 1993 kwam de verhalenbundel Dwelen deur dook oet bij Het Drentse Boek. In 2000 verscheen bij oetgeverij Servo het kinderboek Marinus Moesie en aandere vertellegies dat ze samen schreef met Beate Plenter. In 2000 verscheen ook de verhalenbundel Strapatsen. Miny hef een jaor of wat een Drèentse column had in de Drentse kraant en het Neisblad van het Noorden. In 1987 hef zij de Reyer Onno van Ettingenpries kregen, de anmoedigingspries veur Drentstaolige literatuur. Miny was ien van de eersten die over vrouwenemancipatie schreven hebben. Ok bestuurlijk was Miny Hofsteenge actief in de Drentse taolwereld. Zij zat een jaor of wat in het bestuur van de Stichting Drentse Taol. (Bron: Henk Nijkeuter - Waor roet en blommen wortel schiet in ‘t veld) De Drentse taolwereld zal heur missen. Wij wenst heur man Henk en de femilie veul starkte bij het verwarken van dit verlies. 

Roem dartig Drentse schrievers hebt mitewarkt an een neie bundel mit Drents- en Nederlandstalig proza en poëzie, Alles wat hier wortel schiet. Het is een initiatief van de Neie Drentse Schrieverskring. De eerste Drentse Schrieverskring wordde op 18 februari 1953 in Grunnen opericht. Gerard Nijenhuis beheurde tot de initiatiefnemers. Op 29 mei 1996 wordde de Kring, as gevolg van interne ruzies opeheven. Het was in 2012 opnei Gerard Nijenhuis die wederom, noe samen mit Suze Sanders, het initiatief nam um de schrievers van Drenthe samen te brengen. Niet allent de Drentstalige schrievers wordden uiteneudigd, maar ok de Nederlandstalige Drentse schrievers. Gerard Nijenhuis sprak de wens uut um een bloemlezing te maken van het wark van de huidige Drentse schrievers. Het boek wordde mit mitwarking van het Huus emaakt en zal op zundag 3 juni tussen 14.00 - 17.00 uur prissenteerd worden in de tuun van Mischa van Huijstee, Vaartweg 85 op de Smilde. Het eerste exemplaar zal deur Gerard Nijenhuis in ontvangst enuemen worden. Iederien is van harte welkom en de entree is gratis. Der is livemuziek van Dorien Akkerman en Rob Zandgrond. De bundel wordt uutegeven deur RikRak in Zuidwolde en kost €12,50. Verkriegbaar bij drentheboeken.com en het boek is vanzelf ok te koop bij de prissentatie. 

´t Is best mooi weer en ook de koffie geurt al flink! Dat stiet op de achterflap van de neie Roet. Mit dichtwark en verhalen in het Drents, Nederlands en Grunnings en twee recensies dizze maol! Allemaol weer barre de meuite weerd! Lösse nummers kuj kopen bij het Huus van de Taol veur 4 euro. Maar ie kunt vanzelf ok een abonnement nemen op dit literaire tiedschrift. Dat kost €14,50 per jaor en daor kriej veer de Roet veur. Mooi um te lezen bij mooi weer en een geurende kop koffie! 

De Drentse week in  de Friese culturele hoofdstad van Europa in het Lân van Taal is begund! De Drenten hebt het overeneumen van de Limburgers en prissenteerden o.l.v. Baukje Bloemert van Het Drentse Boek de bundel Binnenkort uitverkocht van Het Drents Light Verse Collectief. Het is een dichtbundel met Ollekebollekes van veer Drèentse dichters, Rob Boudestein, Ton Peters, Gezienus Omvlee en Ben Hoogland, over kunstwarken in de openbare ruumte van Grunning, Drenthe en Frieslaand. De foto's in het boek bint emaakt deur Jean Mus. Zij kreeg het eerste exemplaar van de schrievers. Het boek is te koop in een aantal Drentse boekwinkels en ok via de webwinkel van Het Drentse Boek 
De rest van de Drentse week in Talenpaviljoen MeM in de Prinsentuun: Op donderdagaovend 10 mei zal Margaretha Kleine optreden samen mit de Freeise band Mosken. Op zundag 13 mei nemp Braobant ’t weer van de Drenten over, en dan is er een Brabants-Drèents programma. Bert Rossing van het Huus van de Taol en Jos Swanenberg uut Braobant leest veur in de taal van de aander. Wieder dizze middag de uutreiking van de priezen van de Nedersaksische schriefwedstried. De winnaar les zien of heur verhaal veur. De Rederiekerskamer Börger speult het stuk Mien eigen weg en het Brabantse duo Lya de Haas en Hennie Korsten treedt op en zingt liedties in het Brabants. Kiek hier veur meer informatie

STEM (Stichting Taalpodium Emmen) organiseert het Nederlands Kampioenschap Light Verse Dichten 2018. De gedichten moet in het Nederlands eschreven worden of in een Nederlandse streektaal.Zie het persbericht hieronder.

Pagina 1 van 45