Jonge, Cobi de (1946)

Jacoba Aaltje de Jonge is geboren in Valthermond aan het Zuderdaip en opgruid in een boerengezin.

Deur het schoolradioprogramma 'Ritme en Rijm' en het boukie 'Het fluitketeltje' van Annie M.G. Schmidt kreeg ze belangstelling veur gedichten en versies. Ze bedacht al op jonge leeftied toneelstukkies veur de buurkinder.

De laifde veur de ruumte en de geur van het baauwlaand is aaltied bleven. Nao de legere school ging ze noar de Middelbaore Meisjesschool in Emmen. Laoter dee ze aovendgymnaosium en M.O. geschiedenis in Grunnen.

In stad, op kaomers, was de tied riep om gedichten te schrieven en uut te geven.

Het schrieven is toun aal maor deur gaon: gedichten, verhaolen, laidteksten met melodie, smartlappen,  heurspel, ainakters, cabaret, musical (o.a. veur Amnesty over vluchtelingen), raisverslaogen (ze was bie het vaolen van de mure in Berlien)...
Deur vrijwilligerswaark bij vluchtelingen, verzörgingstehuzen en as mantelzörgster lag de inspiraotie dicht in de buurt.

Deur de Drentse Schrieverskring is ze ook meer in het dialect gaon schrieven en ging ze optreden met heur aigen aovendvullend programma, met gedichten, verhaolen en zang.

In heur functie van traauwambtenaor gebruukt ze soms de streektaol. Ain keer per jaor is ze veurganger in Valthermond in kerk no.11 en schrift ze de preek en laidteksten. Verder holdt ze regelmaotig touspraoken bie begraofenissen en cremaoties in het dialect. Cobi de Jonge is Lid van de schrieverskamer 'De Clique' in Emmen.

Ze publiceert in verschillende tiedschriften. Gedichtenbundels bint o.a. De horizon voorbij, Zuster waar ben ik, Alle dagen van december en Zomer. Ze hef ok boouken schreven Engel in het hoogveen (samen met Henny Moes) en Veur joe.

Cd: versies in het dialect. Zij is nou bezig met een bundel kindergedichies en versies veur kinder van 2 - 5 jaor.

Media