Moi!

Ik bin Amber Tieck, uut Emmen. Febrewaori van dit jaor bin ik as stagiair begund bij het Huus as underdiel van mien masterstudie Meertaoligheid. Nou onze collega Arja met verlof is, vervang ik heur samen met Jan Germs as streektaolfunctionaris. Met de dag leer ik meer over wat zuch ontwikkelt op het gebied van het Drèents (en Nedersaksisch als gehiel) en krieg ik de kaans mij der zölf ok veur in te zetten. Dichterbij as dit komp het veur mij niet, as we het hebben over van joen hobby, joen wark maken.

Allewal ik wal zeggen zul dat ik met het Drèents opgruid bin, kan ik niet zeggen dat ik ok Drèentstaolig opvoed bin. Mien olders, die van Erica en Klazienaveen kommen, preuten het wal met mekaar, maar ik weur Nederlandstaolig opvoed. Destieds was de algemiene opvatting ok dat het beter weden zul um kinder niet in de streektaol op te voeden – een opvatting waorvan inmiddels het tegendiel bewiezen is. Streektaol in de opvoeding metgeven an kinder blek juust goed te weden veur de ontwikkeling en hef een beste bult veurdelen. Veur mij gold dat hoe older as ik weur, hoe meer as ik de weerde van het Drèents in begunde te zien. Daorum bin ik hier vanuut mien studie underzuuk naor doen gaon en heb het mijzölf anleerd. Elke dag leer ik neie woorden en uutdrukkingen waor ik me over verwondern kan.

Ik denk dat gloepends mien lievelingswoord is, umreden dat het mij deran denken döt daw bij mij in huus vrogger altied dachten, dat het gien echt woord was. As mien va dan ruup “Dat is gloepends hiete!”, dachten mien mam en ik dat e dat woord zölf verzunnen har. Tot ik met het Drèents an de gang gung en we derachter kwamen dat het een hiel gewoon Drèents woord is. Sinds die tied leren wij aal meer over het Drèents en biw ok gloepends wies met onze taol.