In memoriam Eite Brink ( 29 juni 1930- 2 jannewari 2021)

Eite Brink, Drents schriever oet Raol, is op 2 jannewari oet de tied kommen. Eite Brink was niet allent Drents schriever, maor was jaoren as vrijwilliger betrökken bij Drentse Taol en later het Huus van de Taol en was een enthousiast veurstander en gebruker van de Drentse taol.

Eite Brink gruide op in Assen. Zien maatschappelijke loopbaan bracht hum naor Rotterdam, waor hij  administrateur weur bij de douane in Rotterdam. Hij woonde daor met zien vrouw en kinder tot zien pensioen in 1987, waornao hij in Assen en later Raol te laande kwam.

As schriever vun Eite Brink dat hij lang niet alles goed in de standaardtaol overbrengen kun; daorveur had hij de streektaol, in zien geval het Drents, neudig. Hij was dervan overtuugd dat de beide taolen mekaar anvult en hij vun dat der Drents praot worden mus as het kun.

Eite Brink hef zuch benaom toelegd op het schrieven van körte verhaolen en gedichten, meest luchtig van toon. In de tiedschriften Maandewark/Oeze Volk en het Drents letterkundig tiedschrift Roet is wark van hum publiceerd. Hij schreef graag en goed light verse gedichten met een humoristisch-satirische undertoon. ‘Gniezerties’ nuumde hij dizze gedichties zölf. Daorin was zien fiene taolgevuul goed te zien. In 1995 verscheen zien verhalenbundel Brobbels.

Ok schreef hij graag verhalen en gedichties veur kinder, die ok vandaag de dag nog steeds geregeld bij bijveurbeeld onderwiesprojecten gebruukt wordt.

As enthousiast vrijwilliger en creatief taolgebruker weur hij bij de Drentse Taolorganisatie al gauw een belangrieke vrijwilliger. Hij was jaorenlang eindredacteur van het donateursblad De Taolkraant en har bij Omroep Assen een zundagmorgenprogramma.

De Drentse taalwereld verlös in Eite Brink een enthousiaste en trouwe veurvechter van de streektaol en een schriever die wardering verdient.

Het Huus van de Taol wenst zien familie van harte starkte.

————————————————————

Ien van de kindergedichten van Eite Brink:

De kebouter-kapper

Dreutel is een luie donder
daorum was ‘t agil gien wonder
dat e zunder baontie zat
want hij hef wal honderd had

ik wul best kebouter-warken
ok al vin ‘k dat meer veur starken
zee dwerg Dreutel maor ‘k verdom ‘t
as ‘t mij an de pokkel komt.

der möt met jou toch wat gebeuren
kreeg Dreutel lestendaogs te heuren
want de sociaole zaoken
begunt al mooi deur ‘t geld te raoken

Dreutel die vandaog begon
met een neie kapsalon
kreg veur vast gien iene klaant
want van knippen hef e gien verstaand
en…

zeg Dreutel, neudig is ‘t niet
da’k hier scheer of haoren snied
as der baord- of heufdhaor of moet
trek ik der wel een fossie oet