Huus van de taol zuukt tenielgroepen die in juni 2021 an het Drèentstaolige ienakterfestival Kört&Goed metdoen wilt. Dizze keer niet binnen, maor in de openluchttheaters in Drenthe.

Het zul eigenlieks in meert 2021 wezen. Maor met de anderhalvemeterregel veur en op het podium kuj in veul dörpshuzen en zalen niet uut de voeten. daor is meer ruumte en frisse lucht veur neudig. En dus heb we besleuten um het festival daor te speulen waoras der wel ruumte en frisse lucht is: in de openluchttheaters in Drenthe.

Uutgerekend dit jaor haw een grote cursus ‘ienakters schrieven’. En dat hef tien neie tenielstukken opleverd. Um het Drenst an te fietern haw een koppel van dizze stukken in meert op de planken zien wilt. Ze bint niet schreven met de coronaregels in de kop. Toch deinkt wij dat ze hiel best in de openlucht op anderhalvemeter speuld worden kunt. Ok een vrijscène kan hiel best … op ofstand! ‘t Is een extra uutdaging veur de regisseurs.

Op oeze website staon de neie ienakters. Tenielverienigings en aandere groepen tenielspeulers kunt zuch tot 1 december veur Kört&Goed anmelden. Stuur een mail naor info@huusvandetaol.nl. En waj speulen wilt stiet vrij vanzölf. Een zölfschreven stuk of een Drèentse klassieker mag ok.

Over een toertie maak wij de naomen bekend van de openluchttheaters waoras de drie veurrondes en de finale wezen zult.

Foto: openluchttheater ‘Tivoli’ in Assen