Het eerste exemplaar van ‘Snuustern in Drenthe’s natuur en cultuur’ is veur Sonja van der Meer (directeur Drents Landschap) en veur Marieke Vegt (directeur Kunst & Cultuur). Een heuivörk mut der bij kommen um het boek coronaproof prissenteren te kunnen.

Het plan was aans: tiedens het vrijwilligers-evenement Koester Drenthe zul Jan’s neiste boek prissenteerd worden. Maor deur de corona is dat tot april 2020 oetsteld. Oetgeverij Het Drentse Boek vun dat de geboorte van Snuustern in Drenthe’s natuur en cultuur niet langer oetsteld worden kun.

In zien boek nemp Jan van Ginkel je op zien snuustertochten deur de natuur en cultuur van Drenthe met. Zo koj bij de luiberts in De Wiek, zit je naost een wolf en ruuk je an de stinkende paddestoelen an het Oranjekenaal. Mor ok een gedicht van Roel Reijntjes en de tiekenings van Siemen Dijkstra komp veurbij.

Het is vrijdag 30 oktober 2020. In de huuskamer in Örvelt komt Jan met de heuivörk de kamer in. De eerste twei boeken ligt op de vörk tegen de eerpels an. Sonja van der Meer pakt der ién of en dan Marieke Vegt. Oetgever Bert Rossing van Het Drentse Boek filmt alles coronaproof veur aal dat volk dat der niet wezen mugt. Op Facebook en Youtube van het Huus van de Taol kuj ’t bekieken.

Op vier november wordt het boek bij de leste boekhandels van Drenthe ofleverd. Vanof dan dus overal te koop veur € 19,95 of te bestellen in de webshop