Underzuuk: olders wilt geern Drentstaolig opvoeden

Amber Tieck (foto), masterstudente Multilingualism an de RuG, hef in heur stagetied bij het Huus van de Taol underzuuk daon naor Drentstaolig en meertaolig opvoeden. Olders die Drentstaolig opvoedt bliekt veural behoefte te hebben an het dielen van ervaringen en (les)materiaal in het Drents.

Umdebij 150 reacties hef ze op heur vraogenliest kregen, waorbij der slim positieve holding van olders tegenover het Drents of te lezen was, ok as ze zölf niet Drentstaolig opvoedt. Starker nog: veul olders die niet Drentstaolig opvoedt vindt wál dat het neudig is dat meer olders heur kinder met de streektaol grootbrengt.

Veul olders die niet Drentstaolig opvoedt denkt nog dat Drents een negatieve invloed hef op schoolprestaties en carrierekaansen. Tegen dat eerste is intussen bewies genog: meertaolig opgruien pakt juust slim positief oet veur kinder.

In heur conclusies markt Tieck op dat bewust naodenken over de taol die aj spreken gaot tegen een kind vaak pas een vraogstuk wordt nao de geboorte. En, schref ze verder, sprekers zölf hébt al een positief beeld van het Drents. Ze hebt zölf de toekomst van de taol in haanden deur de taol actief te gebroeken.