Proeftuun Meertaoligheid

Op 1 juli is bekendmaakt welke prejecten subsidie kriegt in het kader van de Proeftuun Meertaoligheid.

De prejecten bint veural richt op streek- en minderheidstaolen, zoas het Nedersaksisch (waor ok het Drents under valt). Vief cultuurinstellingen in Drenthe, Grunning, Friesland, Overiessel en Gelderland kriegt in totaal € 270.000 subsidie oet de Proeftuun Meertaoligheid.

De subsidie giet naar de volgende cultuurinstellingen:

Wordspoken:

De hiphopformatie Wordspoken bestiet oet hiphopartiesten oet de noordelijke previncies en Gelderland en Overiessel. In heur show combineert ze het Fries, Nedersaksisch en stadsdialect op een speulse en vindingrieke wieze met taolgebroek van nou. De stichting Popfabryk kreg een bijdrage van € 70.000.

Skik boartsje

De Kunstenmakers ontwikkelt een bordspel um kennis te maken met de diversiteit an taol en cultuur in Nederland. Het bordspel Skik boartsje giet over het Nederlands, Nedersaksisch (alle grote en bekende dialecten en streektaolen), Fries, straattaol en gebarentaol. De Kunstenmakers kriegt € 70.000 subsidie.

Pidgin X

Pidgin X is een idee van preductiehoes Explore the North en kunstenaar Ahilan Ratnamohan. Ze warkt an het ontwikkeln van een tweide, democratisch vormde taol in een stad of dörp in Noord-Nederland. Eerst giet er een proef dreien in Leeuwarden, daornao wordt Pidgin X oetzet in de previncie Grunning. Stichting Explore the North kreg € 50.000 um het concept wieder te ontwikkeln.

De Kraak

Preductiehoes Spinbarg kreg € 50.000 veur het maken van een veurstelling met animatie, beeldende kunst en meziek. De veurstelling mut mèensen bewust maken van de landschappelijke en (cultuur-)historische weerde van de eigen leefumgeving. De veurstelling giet op tournee deur het noorden en oosten van Nederland, Noord-Duutsland en meugelk ok in Denemarken.

Once upon a time in the North

Het Frysk Harmony Orkest kreg een subsidie van € 30.000 veur de organisatie van prejectdagen met actieve workshops, entertainment en muziektheater. Der bint drei veurstellingen, waorunder in Grunning. Een zangkoor vertelt de verhaolen in de streektaol.

 

Proeftuun Meertaoligheid

De proeftuin meertaoligheid is een initiatief van We the North in samenwarking met de previncies Gelderland en Overiessel en het Ministerie van Underwies, Cultuur en Wetenschap. De Proeftuun Meertaoligheid hef al doel um de inwoners van de vief previncies deur prikkelnde culturele prejecten op een leegdrempelige wieze kennis te laoten maken met de diversiteit an meertaoligheid in de regio. het vierjaorige cultuurprogramma We the North is een inititatief van de drie noordelijke previncies en de gemienten Assen, Leeuwarden, Grunning en Emmen.