Yvonne Bijl-Hooijer

Yvonne weur in 1966 in Hollandscheveld geboren.

Yvonne Bijl-Hooijer (1966)

Zie was het veerde kind van de in de wiede umtrek bekend staonde maodenboer Harm Hooijer. As jong wichie was Yvonne dan ok geregeld te vinden  in de schuren, veur de lösse verkoop van maden an de vissers oet de buurt.

Nao de legere schoel gung zij naor de MAVO en laoter naor de HAVO in Hoogeveen. In die periode leerde zij Johan kennen, met wie ze in 1988 trouwd is. Zie warkte zowat 25 jaor as receptioniste/telefoniste bij een accountantskantoor, maar nao een opleiding medisch secretaresse gung ze an de slag in het Bethesda Ziekenhuus in Hoogeveen. Nou warkt ze as secretaresse bij de GGZ.

Schrieven döt Yvonne al heur hiele leven. Eerst vertrouwde zij heur geheime gevulens toe an heur dagboeken, later gung ze ok gedichies en körte verhaalties schrieven.

Naodat ze de ‘Drenthecursus’ van het Huus van de Taol volgde, weur heur liefde veur de Drentse taol nog meer anwakkerd. Zie sleut zuch an bij de Schriefwarkgroep van het Huus van de Taol en van het iene kwam het aander. Zo hef ze gedichten veurlezen bij Taal an Taofel, op festivals staon en in 2018 volgde heur eerste gedichtenbundel Zwanekiend.

Sinds november 2018 is ze vast columniste veur Regionieuws Hoogeveen.nl. Um de aandere weken stiet daor een verhaol over ‘De baos en ikke’.

Sinds april 2019 is ze ok nog ies Streektaolambassadeur veur de gemiente Hoogeveen worden.

Publicaties

Zwanekiend (2018, Het Drentse Boek)
De Baos & Ikke (2020, eigen beheer)