IENAKTERFESTIVAL KÖRT & GOED

Um het jaor organiseert het Huus van de Taol in de meertmaond-streektaolmaond het ienakterfestival Kört&Goed. De eerste maol daw dit festival organiseerden, was in 2015. Tot nou an toe doew het aal maol op dezölfde manier: op zien hoogst twaalf ienakters wordt op drei aovends speuld op drie verschillende plekken in Drenthe. Een jury is der natuurlijk ok en kek wat of der op de plaanken bracht wordt. Aal aovends is der een winnaor. Dizze drei winnaors komt laoter in de finale en de ‘beste tweide’ van de veurrondes mag daor ok hen. De finale hef de leste jaoren aal maol in schouwburg Ogterop in Meppel west. Daor is dan weer een neie jury um het tenielwark te beoordielen.

Wel kan metan doen?

Tenielverienings, buurtverienings, vriendenclubs of welke aandere groep dan ok kan zuch anmelden um met te doen. De grootte van de groep is niet belangriek, maor het mot wal allemaol op het podium passen.

Eisen veur de ienakter

De ienakter duurt tussen de 20 en 30 minuten en is hielemaol of veur ’t grootste diel in het Drents. In de keuze van het soort stuk bi’j hielemaol vrij: van familieveurstelling tot klucht tot diep droevig en alles waj wieder maor bedenken kunt.

Het stuk mot ok op kleine dörpspodiums (4 bij 7 meter) speuld worden kunnen. Der kunt niet al te veul decorstukken gebroekt worden, want der zit vaok niet meer as tien minuten tussen de verschillende opvoeringen.

Vergoeding en begeleiding

Wij vindt het mooi as de ienakters zölf schreven bint, maor zie kunt op opvraogd worden bij de bekende oetgeverijen, bibliotheken of bij het Huus van de Taol. Elke groep die metan döt, kreg 100 euro um in elk geval een diel van de kosten (zoas veur de productie en Buma e.d.) betaolen te kunnen.  Wieder hebt de dielnimmers recht op deskundige hulp op het gebied van de Drentse taol en understeuning bij de regie (via het Huus van de Taol).