Warkgroep Drenten in de Vrömde

10 sept 2008

Twintiger/dartiger jaoren veurige eeuw

In de twintiger/dartiger jaoren van de veurige eeuw was het in oeze previncie Drenthe op economisch gebied gien vetpot.
Beter zegd, de toestanden waren allerbelabberdst. Warkloosheid, armoe, 't was niet best, veural in de veengebieden.
Reden veur een hieleboel Drenten um heur heil argens aans in het laand te zuken.
De grote steden in het westen waren in trek, maor ok de textielgebieden in het oosten en Eindhoven in het zuden kregen veul Drenten op de kost.

Het volk kreeg het in die neie streken stukken beter as in de olde landschap. En vanoet de gebundenheid met mekaar in het neie gebied ontstunden der in de twintiger jaoren de verienings van Drenten. De Drenten in de Vrömde dus.
Zo hef de bekende Harm Smeenge in 1928 de steut geven tot de oprichting van de ofdieling Amsterdam. Vanoet die Drentse verienings in de vrömde wuur der zölfs materiële hulp an de olde landschap beuden.

Later hebt dizze verienings veul meer het stempel van gezelligheidsclubs kregen. Plekken waor de old-Drenten mekaar ontmoetten en waor de Drentse Taol nog spreuken wuur.
Tenielverienings, zangclubs, kaortclubs, van alles wuur der opricht.

De warkgroep 'Drenten in de vrömde'

In Drenthe zölf ontstun de behuufte um het contact met die Drenten in het land goed vast te holden. Vanoet het niet meer bestaonde Drents Genootschap (de Culturele Raod van Drenthe) wuur der een sectie opricht die zich bezighöld met die contacten. En ok vandage an de dag nog bestiet dizze sectie under de naam Warkgroep Drenten in de Vrömde. Een veurzitter die woonachtig is in Drenthe en een aantal bestuursleden, recruteerd oet de ofdielings in het laand.

 Drentenindevromde

Op dit moment bestiet de warkgroep oet:

  J. Bruins (veurzitter)
  A. Leugs(sikketaoris)
  W. Kroon (penningmeester)



 


In de ienentwintigste ieuw

D'r bint nog tien ofdielings in oes laand, waorvan der twie in Emmen zetelt n.l. 't Aol Volk (www.aolvolkemmen.nl) en 't Volk van Grada (volkvangrada@historisch_emmen.nl)

Maor, Drentse verienings hebt het niet makkelk um genog leden over te holden. Hoewal de vergriezing beheurlijk toeslat, bint d'r nog aaid veul activiteiten op cultureel gebied.
Ok vanoet Drenthe trekt nog veul 'artiesten' het land in um de mèensen te vermaken met producten van oeze Drentse cultuur. En ien keer in de twie jaor komt nog honderden old-Drenten een dag naor de zogenuumde Drentendag.