Harm Westebring is oet de tied kommen

3 juli 2018

Zaoterdag 30 juni lestleden is Harm Westebring nao een tied van gestaog achteroet gaonde gezondheid oet de tied kommen. Harm was op allerlei gebied slim actief (hie was u.a. ien van de oprichters van de Drentse Historische Veriening) en in de wereld van de Drentse taol was e hiel bekend. Hie hef umdebij 35 jaor in het bestuur van het maondblad Oeze Volk zeten en daor schreef e ok geregeld gedichten en stukkies proza veur. Tot 2002 - toen e zien bedrief over dee an ien van zien zeuns - was Harm Westebring boer in Ieghaor. Het understaonde gedicht Stoppelploegen is dan ok niet vrumd. Harm Westebring is 81 jaor worden. Wij wenst zien vrouw, kinder en kleinkinder veul starkte bij het verdragen van het verlies van Harm.

 

Stoppelploegen

Hie bouwt het laand
Legt stoppels under
't zwaarte zaand
De meeuwen schreeuwen
Met krijsend geluud
zuukt zie, der peiren uut.
De pieren gieren
of kruupt under de kloet
en wint zo 't leven oet.
Hef de boer 't ploegen daon
en bint meeuwen hen 't veentie gaon!
Stoppels kunt rotten
en pieren verder wrutten.
Het laand lig met zwaart gezicht
naor 't neije jaor gericht,

 

Te laot!

De locht zet an,
Daor krig we vast wat van
De bui komp hogerop,
we kriegt hum op de kop.
De locht die wordt ontlast
en wij onaangenaom verrast.
Wij gaot hen hoes, we gaot hen moe.
Krigt droge kleer en foeters toe

Liesterkrallechies

Mooie rooie ronde ballechies
Mooie rooie liesterkrallechies
Mooie rooie ronde zunnechies
Mooie kromme weidewallechies

 

Bronnen:
-Waor roet en blommen wortel schiet in 't veld - Henk Nijkeuter. het Drentse Boek 2016
-Archief Oeze Volk