GEA GEERSING IS OET DE TIED KOMMEN

23 apr 2019

Gea Geersing har de streektaol lief. Verscheiden jaor was ze in de gemiente Noordenveld een hiel actieve keurnoot. Oet warme belangstelling kwamen ie Gea - vaak in het gezelschap van Lenie Been - geregeld tegen op allerlei streektaol-bijienkomsten. En as het Huus van de Taol wat organiseerde was Gea der zeker bij. Goedlachs, betrökken, belangstellend naor aandern. Je kunden van Gea opan.

Toen een jaor of wat leden de vreselijke ziekte bij heur vunden weur, reuk oes dat in het Huus van de Taol diep. Zo jong nog was Gea. En ondanks de zwaore behandelingen bleef ze kommen as dat maor ienigszins meugelijk was. Op de vraog hoe of het met heur gung, was ze eigenlijk nooit negatief. Zie bleef de plezierige, hartelijke, geweldig aordige vrouw die ze altied al west har.

Maor de slopende ziekte kun ze ondanks al heur positieve energie niet overwinnen. Op woensdag 17 april lestleden is Gea oet de tied kommen. Op heur kaort stiet te lezen:

Ik heb het leven liefgehad
zo omarm ik ook het eeuwige
wie mij liefheeft, heeft ook het leven lief
heb verdriet, maar vindt het plezier weer terug
alleen om mij dat plezier te doen.