100x KUNST OP ZIEN DRENTS... SCHIER OM TE KRIEGEN OF VORT TE GEVEN

Oflopen zaoterdag is de bundel '100x Kunst op zien Drents' oetkommen. Veur maor 10 euro een prachtig boekie um ies lekker in te snuustern. En lees dan niet te rappies over de woorden hen. Misschien denk ie bij dook an een doek of verwacht ie dat een klied een kleed is. Nou, dat hej dan fout dacht. En beulen legt je hier gien strop um de nak, biesten is niet hetzölfde as beesten, een poppie is gien kleine pop, een liek is hier gien lijk. En denk ok niet dat het Drentse snakken hetzölfde is as het Nederlandse ‘ergens sterk naar verlangen’. Zo is een schoft hier gien minne kirrel.
Zuuk ok ies naor de zende, het diggelgoed, de iemenpiep en grel of eernsachtig. Gewoon umdat het zukke mooie woorden bint. En zie hoe mooi of biezunder die woorden verbeeld bint. Neisgierig? Mooi zo! 

Het boekie '100x Kunst op zien Drents' is te koop bie de boekhandel, het Huus van de Taol, het Drents Museum en op drentheboeken.com.