Annemiek Drenth neie ambassadeur veur gemiente Emmen

In doezendpoot Annemiek Drenth uut Emmer Compascuum hef streektaolorganisatie Huus van de Taol een neie ambassadeur vunden veur de gemiente Emmen. Drenth volgt Roelof Keen op, die deur gezondheidsredenen in december 2019 stoppen mus.

Zangeres én trouwambtenaar Drenth wun in 2012 het allereerste Drèents Liedtiesfestival. Hierover zeg ze zölf: “Wat is mooier as zingen in je moerstaol?” Dizze week weur bekend dat ze ien van de deelnimmers is van het programma ‘Drentse zangers’ dat op 5 juni begunt.

Directeur Renate Snoeijing: “Het spiet oes daw ofscheid nimmen mussen van Roelof Keen. Hie hef veul betiekend veur de Drèentse taol en gelukkig blef e wel as schriever actief. Wij bint der slim wies met dat Annemiek nou het stokkie overnemp. Het is mooi um te zien dat het Drèents ok bij een jongere doelgroep nog springlevend is. Met Annemiek haal we een jong iemand binnen met een groot hart veur de streektaol! Wat woj ok met zo’n toepasselijke achternaom!”.

Drenth zörgt samen met andere vrijwilligers veur de organisatie van streektaolactiviteiten in de gemiente Emmen. Ien van de eerste activiteiten dit jaor is het veurlezen op basisschoelen.