Dick Blancke (1952)
Daornao hef e het ‘Nationaal Instituut voor Middelbaar Economisch en Technisch Onderwijs’ in Utrecht bezöcht, een veerjaorige opleiding veur vörmgeving. Nao dizze opleiding is e toch een aandere kaant op gaon en hef e de ‘Middelbare Beroepsopleiding Sociaal Kultureel Werk’ in Hengelo daon. Hie warkte u.a. in het jeugdwark in Schoonebeek en Börger en weur groepsleider in het Boddaert Centrum in Emmen.
Dit directe contact met kinder leverde hum ideeën veur zien kinderverhalen. Um meer tied te kriegen um te schrieven is e dieltied-metwarker van het cultureel centrum worden. Dick was antrökken um de publiciteit rondum de programmering te regeln.
Dit was ok het begun van zien loopbaon bij de radio. Veur Radio Noord leverd’e körte Drentse bijdrages in het programma Mandielig en daarnao kreeg e een eigen kinderpregram: Het is Dik aan… Dit kinderpgregram was in het Drents, in het Grunnings en in oeze landstaol.
Hie woonde in Nei-Zwindern en van 1991 tot 2001 in Linde. Daarnao gung e met zien vriend Ron in Arles sur Tech in Zuud-Frankriek wonen.
Zien eerste bijdragen in de Drentse taol waren liedteksten veur de rockgroep Turf Jenever en Achterdocht, waor Dick ok zanger van was. Hie hef een poosie redacteur van Roet west. Hie schreef ok gedichten in Roet.
Dick Blancke was ok de eerste Drentse schriever die openlijk het thema homoseksualiteit in zien gedichten gebroekte. Zien eerste publicaties undertiekend’e allén met zien veurletters.
Hie schreef tenielstukken, kinderverhalen en gedichten.
Wark van hem weur opnummen in Drèents kienderboek, (Zuidwolde 1984 en herziene oetgaove 2002) en een koppel bloemlezings. Hie schreef in 2004 de tekst van het stripboek Ellert en Brammert – twei Drentse donderstienen (tiekeningen van Ben Huisjes). In 2017 kwam van Dick de bundel Twie ezels en meer … Verhalen uut Frankriek oet. Zien poëzie is nog niet bundeld.
In meert 2010 verscheen het schrieverspetret op video en dvd van Dick Blancke met as titel Met oes beiden.
Publicaties:
- Samen kuj een hieleboel, (Zuidwolde 1986);
- Kobus Knien op pad met Ad de Kat (Zuidwolde 2000);
Dit prentenboek hef e samen maakt met de tiekenares Trudy Kramer. Van dit boek verscheen ok een Grunningse oetgaove. - Tattoo op mien scholderblad (Zuidwolde 2001);
Hier schreef Dick de verhalen veur bij de liedties. - Tenielstukken u.a. veur Vrouwentoneel Erica. De leste was Wat zul Anna zegd hebben (die schreef e toen e al in Frankriek woonde);
- De tekst veur het stripverhaol Ellert en Brammert – twei Drentse donderstienen (Zuudwolde, 2004) is ok van hum (de tiekeningen bint van Ben Huisjes);
- Twie ezels en meer … Verhalen uut Frankriek (meert 2017, Het Drentse Boek-Beilen).
Hierunder kuj een gedicht van Dick lezen.
VEERDE MEI
Straks legt ze weer die kransen
veur heur
die vuulen deur geweld
zij hadden heur
’n gele sterre as tieken opspeld
straks legt ze weer die kransen
Straks legt ze weer die kransen
veur heur
die vuulen deur geweld
zij hadden heur
’n rose dreihoek
as tieken opspeld
de aandre mörgen
ien krans onteerd
de linten d’r ofknipt
gieniene hef ’t leerd.
veertig-viefenveertig
Hitler maokt in mensen underscheid
opheden
eert ze zien slachtoffers
in underscheid
Straks legt ze weer die kransen
Veur heur
die vuulen deur geweld
in gedachten
stao ik daorbij
mien rose dreihoek
as tieken opspeld
in warklijkheid
zit ik in hoes
ik bin gien held
Oet: Vief jaor Roet