Ab Drijver

De musicus/schriever Ab Drijver is op 29 april 1944 in Assen geboren.

Ab Drijver (1944)

Hie woont nog altied in de Drentse hoofdstad. Deurleren was der niet bij in ‘t gezin waorin e groot worden is. Der mus geld verdiend worden. Veurdat e op zien drieëndartigste jaor een opleiding volgen gung an de journalistenschoel, hef e al hiel wat baanties had. Hie warkte in een drukkerij, een metaalfebriek en tien jaor as vrachtwagenchauffeur.

Het winnen van een verhalenwedstried van de vakbond FNV was feilijk het begun van zien jounalistieke loopbaan. Hie kun an de slag as leerling-schriever bij de Drentse Courant. Daor hef e zuch wieder ontwikkeld. Hie was statenverslaggever, redacteur van de streektaolbladziede en kunstredacteur.
Deur de fusie van de Drentse kraant en het Neisblad van het Noorden kun e zien beroepsmaotige wark ofsluten.

Schrieven dee Ab Drijver al vanof zien dartiende jaor. Verhaalties, gedichten en liedteksten. Hie weur benaom bekend as zanger van lusterliedties met eigen (gevulige) teksten, eerst in ‘t Nederlands, later ok in ‘t Drents. Zien veurdracht en warme fluwelen stem spreekt de mèensen an. Zien Nederlandstaolige poëzie is in de tachtiger jaoren in een stuk of wat publicaties vastlegd.

Vastleggen van wat west hef maor feilijk nooit veurbij giet, dee Ab Drijver in het verhaal De hel vanneis; De hel is opnummen in de verzamelbundel Eldersloo, Drèentse schrievers an de reize. Het giet over de tweede wereldoorlog, of beter zegd de verwarking daorvan, een thema waor e as journalist en schriever vaak met gangs west hef. Hie hef dat daon in de Naardingkwestie en in zien Drentstaolig tenielstuk over het jeudse wichie Nellie: Het wichie dat te veul geluk har, een stuk over de keus die mèensen maakt in oorlogstied en wat veur gevolgen zuks hebben kan veur ‘t wiedere leven.

Ab Drijver schreef De nieuwe dag in gouden glans in 1981 (Foto’s van Wim Becker). Het handelt over de breurs Feitze en Hendrik Bijmolt. Naodat heur verhaal in het programma Showroom verteld weur, kwam der weer hiel veul vraog naor het boek en beleefde het in 2014 zien daarde druk. In de coronacrisis in 2020 is de oflevering van Showroom over de breurs Bijmolt herhaald met as direct gevolg dat der weer veul vraog naor de bundel kwam. Herdrukken was nog een maol neudig. Het boek is verkriegbaar via de webwinkel van het Huus van de Taol.

Van Ab Drijver is hiel wat wark opnummen in verscheiden bloemlezingen.

Boekpublicaties:

  • De nieuwe dag in gouden glans (1981);
  • Wat wilde ik ook weer zeggen (1982, gedichten);
  • Assen Anno, het boek bij de film (1983);
  • Een werteld die voorbij ging (1985, journalistiek interviews);
  • Van boekenkist tot beeldscherm (1988, over bibliotheken op het Drentse platteland);
  • Eeuwig Nieuws – De twintigste Eeuw in Groningen, Drenthe en de Wereld (1999, samen met aandern).

Tenielstuk:

  • Het wichie dat te veul geluk har (1991).

LP’s en CD’s:

  • Seizoenen (1974);
  • Songbird (1980);
  • Zo lang er leven is (1986);
  • Ab Drijver (1991)

Een gedicht van Ab Drijver:

Staol

stiet as een

gladde vreding

baozig

tussen je en mij

tied glidt deur

mien kolde handen

staol en twiefel

ik of wij