Lukas Koops (1952)
Hie hef nao de middelbare schoel Nederlands en Frans studeerd an de lerarenopleiding in Leeuwarden. Daornao hef e achttien jaor leraar Nederlands west in Emmen. In die tied is e ok politiek actief worden. Eerst was e van 1982 tot 1987 gemienteraodslid in Rolde veur de PPR. Van 1987 tot 1995 was e lid van de Provinciale Staten van Drenthe veur Groen Links.
Hie gung daornao vort bij het underwies en de politiek en weur programmamaker bij RTV Drenthe. Sinds 2006 hef e ok een eigen tekst- en communicatiebureau.
In de Drentse taolwereld hef e aordig bestuurlijk actief west. Begun jaoren ’90 was e veurzitter van de Drentse Schrieverskring; under zien veurzitterschap weur de Schrieverskring opheven. Sinds èend jaoren negentig was Lukas bestuurslid van Drentse Taol. Vanof de fusie van Drentse Taol met Het Drentse Boek en Oeze Volk was e t/m 2018 bestuurslid van het Huus van de Taol. Hie is sinds 2007 èendredacteur van het tiedschrift Roet.
Lukas Koops schref en publiceert al sinds begun jaoren ’80 in het Drents: poëzie in Roet en Oeze Volk; vanof 1989 columns van maatschappij- en cultuurkritische strekking veur Radio Drenthe, een stuk of wat regionale kranten en Maandblad Drenthe. Wark van hum is te vinden in verscheiden bloemlezings.
In 1993 kwam de poëziebundel Dood spoor oet. Aander wark is oetkommen in verschillende verzamelbundels. Zien eerste Drentse column hef e schreven in 1989; daornao hef e der nog een hiele koppel schreven. In 1999 bint de beste columns bij ’nkander gaard in de bundel Scholders ophaolen die bij Het Drentse Boek oetgeven is.
In 2003 kwam de sleutelroman Schoeltied oet. Een sleutelroman over de gebeurtenissen op een schoel in een klein dörp as daor een neie hoofdmeester benuumd worden mot. In 2006 hef e ’t boek Altied in de buurt schreven, een boek over zestig jaor regionale umroep in Drenthe. In 2008 kwam Ingehaald door het verleden oet, het verhaal van een NSB-dochter. In 2009 weur Drenthe Verdeeld prissenteerd, een boek over de gang van zaken rond de gemientelijke herindieling in Drenthe. Over de schriever Gerard Nijenhuis hef Lukas Koops een biografie schreven, die under de titel Dat ik besta komt door de taal in 2018 deur Het Drentse Boek oetgeven is.
In Villa Thrianta beschref Lukas Koops de gang van zaken en intriges bij een regionale umroep, waorbij in elk geval het gevuul ontstiet dat het um RTV Drenthe giet.
Lukas Koops wet dubieuze maatschappelijke verschiensels in zien colums met een vliemscharpe pen an de kaak te stellen, maar deur een wat humoristische undertoon haalt e het venien der ok weer wat oet.
In zien gedichten is e aalgedurig an ’t wruten met zien gevuul, maor ’t is stoer um die in taol te vatten.
Boekpublicaties:
- Dood Spoor (poëzie, Zuudwolde 1993);
- Scholders ophaolen (columns, Zuudwolde 2001);
- Schoeltied (roman, Zuudwolde 2003);
- Omzien in weemoed (interviews, Rolde 2005);
- Altijd in de buurt (historie, Zuudwolde 2006);
- Ingehaald door het verleden (Zuudwolde 2007);
- Drenthe verdeeld (Zuudwolde 2009);
- Kamer 27 (Boekenweekkedo 2011);
- Relus ter Beek. Een handelsreiziger in de politiek 1944-2008 (Van Gorcum Assen 2015);
- Gerard Nijenhuis. Dat ik besta komt door de taal. (Het Drentse Boek, Beilen 2018);
- Villa Thrianta (2018).
Een keur oet het wark van Lukas Koops:
TAOLGEVUUL
met 26 letters
papier en parker pen
schrief ik bijna
wat ik vuul
zunder muite
kom ik oet
mien woorden
niet oet mien
gevuul
Oet: Dood spoor
THOES
ik heb in een
zwartumraande adverteinsie
lezen dat e thoeskommen is
waor zul e
al die tied
toch zeten hebben
Oet: Dood spoor