Gerhard Heinrich Vocks

Gerhard Heinrich Vocks weur op 15 meert 1886 op ’t Olde Compas (Barger Compascuüm) geboren.

Gerhard Heinrich Vocks (1886-1969)

Toen e negen jaor was, verhoesde het gezin naor Barger-Oosterveld. As achtjaorig jonkie gung e al as ‘koejong’ an ’t wark in Duutsland. Later kwam e an ’t wark op de törfstrooiselfebriek in Klazienaveen en weur e postbode in Emmen. Hie leerde der wal bij in de aovenduren en oeteindelijk kwam e as ambtenaar te laande op de binnendienst van de posterijen. Dat bracht hum naor Den Helder en Zwolle, waor e vanof 1924 woonde.

Van Hein Vocks bint nao de oorlog twee boeken oetkommen, beide slim autobiografisch. De romans speult zuch of in Zuudoost-Drenthe en de grensstreek. Nao Anne de Vries is Gerhard Heinrich Vocks de tweede schriever die een kind (Hein(i) Heimans) as hoofdpersoon veur een roman opvoerd. Maor – aldus Jan Naarding – zien boeken bint gien ontwikkelingsromans zoas Bartje wal was.
In 1946 kwam het eerste diel oet bij oetgever M.Stenvert & Zoon: Kleine Hein tusschen turfbulten en zandheuvels. Dit boek kreeg in 1947 al zien daarde druk. In datzölfde jaor kwam ok Kleine Hein onder vreemd volk oet bij dezölfde oetgever. In beide romans is de voertaol Nederlands, maor de dialogen bint miest in de streektaol.

Behalve dizze romans hef Vocks ok tenielwark schreven. Toen e al wat older was hef e nog een roman klaor kregen, maor der was gien oetgever die dit manuscript tot een boek maken wol.

Gerhard Heinrich Vocks is in 1969 in Zwolle oet de tied kommen. Hie lig begraven in Barger Oosterveen.

Boekpublicaties:

  • Kleine Hein tusschen turfbulten en zandheuvels (1946);
  • Kleine Hein onder vreemd volk (1947).