Tieme Woldman (1965)
Hie woont nou in Zwolle waor e warkt as freelance softwareontwikkelaar. Zien beide grootmoeders waren verhalenvertelsters pur sang en gaondeweg begreep Tieme dat die met heur verhalen de mèensen waor as zij over vertelden zo in zekere zin in leven heulden.
En zo speult het principe dat ‘zolang as mèensen je verhaal vertelt, daj dan eigenlijks wieder leeft’ een belangrieke rol in zien schriefwark dat ‘factief’ van aord is in de zin dat e feitelijke geschiedenis samen gaon lat met de fictie van zien iegen invulling en veurstellings.
Zien eerste boek, de misdaodroman Moord in het Mantingerveld is zodoende een vrije interpretatie van de nooit opgelöste drievoudige moord in Koekangerveld in 1909 waormet toch ok weer het verhaal van de slachtoffers ‘in leven’ holden wordt.
Wat opzet angiet schref Tieme Woldman, die een groot liefhebber van documentaires is, vaak in een documentaire-achtige vörm waorin naost verhaallijnen met gebeurtenissen ok vertellers in de rol van betrökkene of getuge an het woord komt.
In zien zeer körte verhalen (publiceert in Hard gras, Roet, Maandewark) schetst e biezundere, en tegeliekertied toch ok weer gewone mèensen en situaties, waorin zien liefde veur sport geregeld terugkomt.
Boekpublicaties:
- Moord in het Mantingerveld (2013);
- Mannen bint maakt van jongens (2015);
- Doodzonde (2019);
- De Affaire (2021)
Een keur oet het wark van Tieme Woldman:
MOORD IN HET MANTINGERVELD.
Het is 1938. Mit de dag greuit de dreiging van Hitler en nazi- Duutslaand in het arme Drenthe.
Het volk kan met meuite de endties an mekaar knuppen en vecht veur een karig bestaon.
De ellende van alledag wordt iniens an de kaante edrukt deur een gruwelijke vondst in
het Mantingerveld.
De mieste inwoners denkt dat de dader of daders in heur eigen omgeving te vienden is,
maar de oldste man van het dorp wet dat allent de duvel zelf tot een dergelijke daad in staot is.
Moord in het Mantingerveld is zowel in het Drents (dialogen) as in het Nederlands eschreven en is een
vrije interpretatie van de geschiedenis van de nooit opeloste moorden in het Koekangerveld in 1909.
In 2015 verscheen de novelle Mannen bint maakt van jongens (Eigen beheer)
Korte verhaalties:
MANUEL(A)
De aanderen gungen nao zeuven of acht jaor terug hen
bargdarpen in de Pyreneeën of kochten dat stuk laand met
siniesappelbomen in Valencia dat ze non èendelijk betaalden kunden,
maor hij bleef in Hoogeveen en leesde iedere dag in de pauze op zien
wark bij Thomassen & Drijver hardop oet Elsschots Kaas,
‘ie schrieft “kaas” maor wij zegt hier “kees” of “keze”’.
En tegen collega Kees zee hij dan weer ‘Kaas’ en die leut dat zo.
Maor nao negen jaor kun ’t wichtie van de kantine hum goed verstaon
en zee zij èendelijk ‘ja’ tegen hum en zien achternaam, teminste as
hij niet Jacques Herb op de bruloft zul zingen.
En nog altied legt zij an iederien gepast trots de situatie oet as ze
argens heur achternaam möt zeggen en de leste jaoren voegt ze
daor aal vaker ‘Ja, maor gien femilie van’ an toe.
Maor de eerste tied naodat Iniesta in 2010 ’t doelpunt zette in de
finale tegen Nederland, gebroekte ze allén heur meissiesnaam.
DE AFFAIRE
Een journalist die blind carrière perbeert te maken, twee vrouwelijke politici die mekaor de tent uutvecht en een subsidiefraude van jewelste, dat bint de explosieve ingrediënten van dizze körte roman.
Het verhaol is inspireerd op een waorgebeurd schandaol dat al meer as tien jaor de Drentse politieke gemoederen bezig holdt. De titel ‘De Affaire’ slat zowal op het fraudeschandaol as op de escapade van een journalist die geheime stukken over de fraude toespeuld kreg. Met informaotie die hij via het bedde verkreg, mak de journalist rap naom en lonkt hum grote roem. Maor hij stek zich ok in een wapsennust van macht, seks en intrige waor gien ontsnappen meer uut meugelk is. Ondaanks dat e alles op het spel zet. Of is er toch nog een uutweg?