Gea Aling-Hoving

Mien naom is Gea Aling-Hoving. Ik ben geboren in Dunnern waor in hoes, op straot en op ’t schooulplein Drèents praot wör.

Gea Aling-Hoving

Gea Aling-Hoving Drentse sprekers Huus van de Taol

Taol hef van jongs aof an altied mien interesse had. Een verhaol of een opstel schrieven was veur mij beslist gien straf.

Ik wör kleuterleidster en oefende dit prachtige vak 10 jaor oet veur dat oouze beide dochters geboren wörden. Verhaolen vertellen en veurlezen kun nao mien loopbaon in ’t onderwies dus gewoon deurgaon.

Ondertussen waren mien man en ik eigenaor worden van de slagerij in oouze woonplaots Annen. 27 jaor legden wij ziel en zaligheid in dit mooie ambacht.

In dizze periode overleed mien pap. Vanaof de eerste tree die de oetvaortverzörger bij mien olders over de drempel dee, was ik geobsedeerd deur zien vak.

Toen wij besloten te stoppen met de slagerij veuilen veur mij de passies ‘wark in het oetvaortwezen’en ‘verhaolen schrieven en vertellen’ as puzzelstukkies in mekaor.

De cursus ‘Levensverhalen schrijven en uitspreken’ hef mij op weg holpen om mien lang gekoesterde wens om spreekster te worden bij oetvaorten in vervulling te laoten gaon.

Achter de schaarms kieken bij een ervaoren spreekster was ok zeer nuttig.

 

Het schrieven van een passend ‘In Memoriam’, een levensverhaol,  begunt met gooud lustern.

Tiedens het gesprek met de naobestaonden, dat plaots vindt in een, veur heur, vertrouwde omgeving, is het belangriek om een vertrouwensband op te bouwen.

Het veuilt as een eer dat meensen zich veur je openstellen op èein van de meest kwetsbaorste momenten in heur leven.

Met eerlijke, respectvolle en leeifdevolle woorden mag ik vervolgens tiedens de oetvaort een eerbetoon brengen an een dierbaore die niet meer in heur midden is.

Niet alleein in oouze mooie Drèentse taol, maor ok in het Nederlands vertolk ik de geveuilens van de naobestaonden.

Veur mèensen die wend bennen om Drèents te praoten veuilt het warm en vertrouwd dat dit ok in een verdreeitige tied tot de meugelijkheden beheurt.

Iedere keer weer zeuik ik naor de juuste wieze om van een oetvaort een warm en persoonlijk aofscheid te maoken. Het levensverhaol dat ik hierveur maok kan in het Nederlands of in het Drèents schreven worden.

Om het verlies van een dierbaore te verweven in je leven is een waarm aofscheid de eerste stap!

Gea Aling-Hoving

Spreekster bij uitvaarten – Nederlands en Drents

Noordloo 2

9468 AW Annen

info@gea-aling.com

www.gea-aling.nl

06 22608898