Podcast ‘Praot Drents met mij’

Banner Praot Drents met mij Podcast Huus van de Taol RTV Drenthe

Wij hebt de krachten bundeld met RTV Drenthe en komt met de eerste Drentstaolige podcast.

In Praot Drents met mij prat Renate Snoeijing (directeur Huus van de Taol) met gasten die in Drenthe geboren of getogen bint. Hoe bint ze daordeur vörmd? En wat doet ze vandaag de dag nog met de Drentse taol? En wat döt de taol met heur? Bint er plekken waor ze nou gien Drents praot, maor dat wal wilt? En hoe goed scoort ze eigenlijk, wanneer ze langs de Drentse Doemstok legd wordt?

Een podcast is een radioprogramma daj belustern kunt via internet. En het mooie is, daj het op elk moment afspeulen kunt. De podcast is te vinden op Spotify (linkies staot hierunder bij de ofleveringen), iTunes, Google Podcasts en aandere podcast-apps.

 

Aw van iene weet dat e Drents prat, dan is ‘t William Bossong, bassist van Mooi Wark, wal. Maor dat e in Friesland geboren is, weet maor weinig lu. In de podcast heur we een serieuze kaant van Bossong, die tegenwoordig as ZZP-er in de zörg warkt en daor mangs met agressieve cliënten te maken hef.

 

 

Harry Tupan, directeur van het Drents Museum, holdt zo enorm van Drenthe, dat e hier nooit meer weggiet…”Ja, tussen zes plaankies.”. Hie vertelt over het opgruien in Drenthe in een gezien met twei culturen: een Drentse moe en een Indische va.

Jetta Klijnsma, Commissaris van de Keuning, giet in gesprek met Renate Snoeijing. Klijnsma gruide op an ‘t Hogeveine en vertelt over hoe het gezin der oetzag. Over het Drents praoten concludeert ze: “Misschien mu’k het wel wat vaker doen.” En dat lek oes een hiel goed idee, want ze is ‘t Drents praoten niet verleerd.

In de veerde oflevering een gesprek met doezendpoot Tony Neef. Hie gruide op in Roon, maor woont nou al langer in Amsterdam dan dat e in Drenthe woond hef. Toch vuult e zuch nog altied een Drent en gien Amsterdammer.

In dizze oflevering prat Renate met prof. dr. Ben Feringa over het opgruien op Barger Compas. Hie woont er al hiel lang niet meer, maor altied as e de Hondsrug op giet, dan zet e een piratenzender an en dan vuult e hum geliek weer thuus!

“Ik wil gewoon met D-Pop in de Ziggo Dome staon.”
In dizze neie oflevering van de podcastserie ‘Praot Drents met mij’ een gesprek met zanger Leon Moorman. Hie vertelt over zien jeugd op Barger Compas en over zien liefde veur de meziek.

“Ik nuum mijzölf altied een kind van de Riest. Ik bin nog steeds met de voeten geworteld in Overiessel, maor ik lig met de kop op ‘t kussen in Drenthe en mien lief zwevend boven de Riest. ”
Ria Westerhuis was hielemaol niet van plan um schriever te worden, maor een bijienkomst van ‘Taal an Taofel’ inspireerde heur um te gaon schrieven.
Ria schreef undermeer de erotische bundel Minnezinne, samen met Delia Bremer en daor kreeg ze veul reactie op.

“Ik heb alles an Emmen en Klazienaveen te danken. Dan is het ok mooi as het geld ok weer terugvloeit naor die economie.”
Projectontwikkelaar Peter van Dijk oet Emmen vertelt over het opgruien as adoptiekind op Klazienaveen, over zien biologische mamme die in Noordwiek woont en over zien overstap van witgoed naor vastgoed.

 

“De wichter in de Veenkolonies, zie wolden mie nait hebben. Ik bin as maagd uut Twaidemond vertrökken.”
Zanger en muzikant Bert Hadders vertelt over het opgruien in de Veenkoloniën, over zien interesse in meziek en over 100.000 platen verkopen.

“Bij een Drent is ‘t wal vaak dat as ze zegt dat ze ‘t kunt, dan kunt ze ‘t ok.”
Transportundernimmer Hedy Smit-Wigchers komp van Schonnerd, maor zie hef een hiele zet boeten de previncie woond. Toch kwam ze weer naor Drenthe. Zie vertelt over het warken in een mannenwereld, over heur kinder en over heur oogziekte.