Vrijwilliger worden bij het Huus van de Taol
As streektaalinstituut veur het Drèents biw der met Huus van de Taol um het Drents zo goed meugelijk op de kaort te zetten én te holden. Dat doew met een koppel beroepskrachten vanoet Beilen, maar wat hiel veul mèensen niet weet, is dat we ok een grote vrijwilligersorganisatie hebt van umdebij 130 vrijwilligers. Een koppel daorvan helpt oes in Beilen met allerhande prejecten, aandern zet zuch in heur eigen gemiente in um zoveul meugelijk andacht te kriegen veur de Drèentse taol.
Zo hew in elke Drèentse gemiente (en daor bint er 12 van) een streektaolambassadeur zitten, die samen met zien of heur streektaolvrijwilligers allerhande activiteiten organiseert waorin het Drèents een rol hef. Mangs doet ze dat met heur eigen kluppie, maar vaak wordt er ok samenwarkt met aandere organisaties oet de gemiente.
Aj nou een hart hebt dat sneller giet kloppen van de Drèentse taol en je wilt best zo nou en dan helpen um wat oet stro te zetten, dan biw dus op zuuk naar je! Wij verwacht hielemaol niet daj ’t hiele jaor beschikbaar bint, wij zet je ’t liefst op prejectbasis (zoas dat vandaag de dag zo mooi het) in. Kuj schier veurlezen? Dan kuw je hulp wal gebroeken in de meertmaond-streektaolmaond, wanneer we an 25000 schoolkinder veurleest in de hiele previncie. Bi’j goed met computers en websites? Dan kuj oes lichtkaans helpen met het bijholden van oeze websites. Kuj goed digitaal archiveren? Oeze digitaal archief mut weer ies bijwarkt worden. Hej goeie contacten bij de gemiente? Ok dat is veur oes hiel weerdevol. Help ie liever met de organisatie van de culturele wandeling in het dörp, waorbij underweg Drèentse gedichten en verhalen veurdragen wordt? Ok goed! Zo is der vaak veur elkenien wal wat te doen bij het Huus van de Taol en kuw der samen veur zörgen dat elkenien in Drenthe trots is op de Drèentse taol en daor geern zien steentie an bijdragen wil.
Veur meer informatie kuj altied terecht bij de streektaolambassadeur van je gemiente! En woj wat veur oes in Beilen doen? Vul dan understaond formelier evenpies in. Dan nim we zo rap meugelk contact met je op!