Bozzem

24 apr 2013

Bozzem of bossem röp bij veul streektaalpraoters warme gevulens op.


Toch is het woord niet in hiel Drenthe bekend. In het zuden van Drenthe hebt ze het eerder over schöstienmaantel, schorstienmantel of schösteinmaantel. In neie huzen vien ie gien bozzem of schöstiemaantel meer. De centrale verwarming hef hum overbodig emaakt.

In de 13e druk van de Dikke van Dale stiet as betiekenis bij schoorsteenmantel: het bovenblad van de stenen of marmeren bekleding van de boezem van een schoorsteen.
Hee, boezem van een schoorsteen. Oons Drentse woord bozzem is familie van het woord boezem.

Een bozzem hef plek veur vazen, boeken en aandere snuusterijen. Lees de volgende zinnen maar ies uut het Woordenboek van de Drentse Dialecten.

-          Wat hest doe ja een rommel trommegies op bossem staon. (Valthermond)

-          Zij hef aaid een koppel pronk op de bozzem staon. (Eext)

Ie kunt deel 2 van de vraogenliest nog invullen tot eind april. Op 1 mei stiet der weer een neie liest op www.hetverhaalvanhetdrents.nl