Zij hef sukker

13 juni 2013

Hij heeft diabetes

Met zu’n klein zinnegie van mor dreei woorden kuj toch van alles op ‘t gebied van de Drèentse taol onderzeuiken.

Daartig percent van de invullers hef ‘diabetes’ in ‘t Drèents vertaold met ‘diabetes’. As wij vraogd hadden om de zin Zij heeft suikerziekte te vertaolen, hadden vast veul minder mèensen ‘diabetes’ opschreven in ‘t Drèents. Diabetes is van oorsprong gien Drèents en ok gien Nederlaands, het woord komp van oorsprong oet ‘t Grieks.

 

Ongeveer 20 % van de invullers vertaolde diabetes met ‘suker’ of ‘sukker’. Dat woord komp ok veur in ‘t Woordenboek van de Drentse Dialecten.

 

-          Zo'n beinbreuk geneest slecht aj suker hebt. (Barger Oosterveld)

 

Ongeveer de helft van de deelnemers an de enquête vulde ‘sukkerzeeikte’, ‘sukkerzaikte’, ‘sukerziekte’ of een variant hiervan in.

 

De Drèentse woorden ‘sukker’ en ‘suker’ hebben beide heur eigen gebied. In het Noorden van Drenthe zeggen ze ‘sukker’ en in ‘t zuden zeggen ze ‘suker’. Die grèens lop ongeveer bij Assen. Onder Assen binnen der nog een paor plaotsen die ‘sukker’ zeggen zoas Grol, Raol, Eext, Geeiten en Gasselt. Börger en Bunen binnen twiefelgevallen. ‘Sukker’ en ‘suker’ binnen deur Drentse sprekers oet die plaots beide invuld.